AQSh hukumati DarkSide xakerlar guruhi rahbarlarining qayerdaligi va shaxsini aniqlashga yordam beradigan ma’lumot uchun 10 million dollar mukofot to‘laydi. Bu haqda Davlat departamenti saytiga tayanib, Meduza xabar berdi.
AQSh davlat departamenti, shuningdek, may oyida guruhning Colonial Pipeline quvur liniyasiga uyushtirgan hujumida ishtirok etgan odamlarni hibsga olishga yordam beruvchi ma’lumotlar uchun qo‘shimcha 5 million dollar to‘lashga va’da berdi.
7-may kuni xakerlar AQShning Colonial Pipeline quvur liniyasi kompaniyasiga hujum qilgandi. Ular kompaniyaning kompyuter tizimiga zararli dasturni kiritgan, natijada quvur faoliyati bir hafta davomida to‘xtab qolgan.
Colonial Pipeline kompaniyasi o‘z quvurlarini qayta ishga tushirish uchun DarkSide xakerlariga taxminan 5 million dollar miqdoridagi kriptovalyuta to‘lashga majbur bo‘lgandi. Keyinchalik AQSh Adliya vazirligi pulning katta qismini qaytarib olishga muvaffaq bo‘ldi.
Colonial Pipeline quvur liniyasining uzunligi 8800 kilometrdan oshadi. AQSh Sharqiy sohiliga yetkaziladigan benzin, dizel yoqilg‘isi va boshqa neft mahsulotlarining 45 foizi shu quvur orqali o‘tadi. Kompaniyaga uyushtirilgan kiberhujum AQShning bir qator shtatlarida benzinga talab ortishiga sabab bo‘ldi.
AQSh hukumatidagi CNN manbalarining ta’kidlashicha, DarkSide’ning bazasi Sharqiy Yevropada bo‘lib, guruh asli rossiyalik xakerlardan iborat.
Izoh (0)