Markaziy saylov komissiyasida 24-oktabr kuni o‘tkazilgan matbuot anjumanida tashqi ishlar vazirining birinchi o‘rinbosari Farhod Arziyev so‘zga chiqdi. U o‘z nutqida xorijda muddatidan oldin ovoz berishning natijalari haqida gapirdi. Bu haqda “Daryo” muxbiri xabar bermoqda.
“Xorijdagi elchixonalar va konsullik idoralari huzurida 37 ta davlatda 54 ta saylov uchastkasi, 149 ta shaharda 383 ta va diplomatik vakolatxonalar bo‘lmagan 11 ta davlatda ham qo‘shimcha ko‘chma saylov uchastkalari tashkil etildi.
2021-yilning 14—20-oktabr kunlari 120 ming 524 nafar xorijdagi fuqaromiz muddatidan oldin ovoz berishdi”, — dedi TIV vakili.
Arziyevning ta’kidlashicha, Rossiya (7 ta), Koreya (2 ta), Turkiya (2 ta) va Qozog‘istonda (3ta) tashkil etilgan saylov uchastkalari o‘z faoliyatini mazkur davlatlarning mahalliy vaqti bilan soat 08:00 da boshlagan.
Qayd etilishicha, xorijda yashayotgan fuqarolar ariza asosida, chet eldagi saylov uchastkalaridagi (diplomatik yoki boshqa vakolatxonadagi) saylovchilar ro‘yxatiga kiritilgan. Arizalar yozma va elektron tartibda saylovga 15 kun qolgunga qadar qabul qilingan.
Izoh (0)