Марказий сайлов комиссиясида 24 октябрь куни ўтказилган матбуот анжуманида ташқи ишлар вазирининг биринчи ўринбосари Фарҳод Арзиев сўзга чиқди. У ўз нутқида хорижда муддатидан олдин овоз беришнинг натижалари ҳақида гапирди. Бу ҳақда «Дарё» мухбири хабар бермоқда.
«Хориждаги элчихоналар ва консуллик идоралари ҳузурида 37 та давлатда 54 та сайлов участкаси, 149 та шаҳарда 383 та ва дипломатик ваколатхоналар бўлмаган 11 та давлатда ҳам қўшимча кўчма сайлов участкалари ташкил этилди.
2021 йилнинг 14—20 октябрь кунлари 120 минг 524 нафар хориждаги фуқаромиз муддатидан олдин овоз беришди», — деди ТИВ вакили.
Арзиевнинг таъкидлашича, Россия (7 та), Корея (2 та), Туркия (2 та) ва Қозоғистонда (3та) ташкил этилган сайлов участкалари ўз фаолиятини мазкур давлатларнинг маҳаллий вақти билан соат 08:00 да бошлаган.
Қайд этилишича, хорижда яшаётган фуқаролар ариза асосида, чет элдаги сайлов участкаларидаги (дипломатик ёки бошқа ваколатхонадаги) сайловчилар рўйхатига киритилган. Аризалар ёзма ва электрон тартибда сайловга 15 кун қолгунга қадар қабул қилинган.
Изоҳ (0)