Oliy Majlis Senati raisi Tanzila Norboyeva Toshkent shahridagi 362-saylov uchastkasiga oila a’zolari bilan kelib, prezident saylovida ovoz berdi. Bu haqda Senat matbuot xizmati xabar berdi.
Eslatib o‘tamiz, O‘zbekistonda prezident saylovi 24-oktabr kuni soat 08:00 dan boshlandi. Bir qator viloyat hokimlari, jumladan, Qashqadaryo, Surxondaryo, Sirdaryo, Buxoro, Farg‘ona, Xorazm va Toshkent viloyati hokimlari, shuningdek, Toshkent shahar hokimi Jahongir Ortiqxo‘jayev birinchilar qatoridan prezident o‘zi munosib deb topgan nomzodga ovoz berdi. Bosh vazir Abdulla Aripov ham oilasi bilan birga prezidentlik saylovida ovoz berdi.
O‘zbekistonda jami saylovchilar soni 19 million 859 ming 127 kishini tashkil qilmoqda. Soat 11:00 ga qadar ularning 6 million 669 ming 552 nafari, ya’ni 33,6 foizi ovoz berdi va saylov o‘tgan deb hisoblandi.
2021-yilgi O‘zbekiston prezidenti saylovida ishtirok etayotgan nomzodlarning bari ovoz berish huquqidan foydalanib bo‘ldi. Beshala nomzod ovoz berish jarayonida oila a’zolari bilan birga qatnashdi.
Markaziy saylov komissiyasi raisi Zayniddin Nizomxo‘jayevning ma’lum qilishicha, prezident saylovi qonunchilik va demokratik tamoyillarga asoslangan holda bo‘lib o‘tmoqda.
Izoh (0)