Tashqi ishlar vaziri Abdulaziz Komilov Toshkentning Yakkasaroy tumanida tashkil etilgan 573-saylov uchastkasiga kelib, prezident saylovida ovoz berdi. TIV matbuot xizmati tomonidan “Daryo”ga taqdim etilgan suratlarning birida qo‘liga fuqarolik pasportini tutib olgan vazir byulleten olish uchun navbatda turganini ko‘rish mumkin.
Eslatib o‘tamiz, O‘zbekistonda 24-oktabr kuni soat 08:00 dan boshlangan prezident saylovi soat 20:00 ga qadar davom etadi. Soat 11:00 ga qadar O‘zbekistondagi jami 19 million 859 ming 127 saylovchilarning 6 million 669 ming 552 nafari, ya’ni 33,6 foizi ovoz berdi va saylov o‘tgan deb e’lon qilindi.
Bir qator viloyat hokimlari, jumladan Qashqadaryo, Surxondaryo, Sirdaryo, Buxoro, Farg‘ona, Xorazm va Toshkent viloyati hokimlari, shuningdek, Toshkent shahar hokimi Jahongir Ortiqxo‘jayev birinchilar qatoridan prezident o‘zi munosib deb topgan nomzodga ovoz berdi. Bosh vazir Abdulla Aripov, Senat raisi Tanzila Norboyeva ham oilasi bilan birga prezidentlik saylovida ishtirok etdi.
O‘zbekiston prezidenti saylovida ishtirok etayotgan nomzodlarning ham bari ovoz berish huquqidan foydalanib bo‘ldi. Beshala nomzod ovoz berish jarayonida oila a’zolari bilan birga qatnashdi.
Markaziy saylov komissiyasi raisi Zayniddin Nizomxo‘jayevning ma’lum qilishicha, prezident saylovi qonunchilik va demokratik tamoyillarga asoslangan holda bo‘lib o‘tmoqda.
Izoh (0)