Fransiya elchisi Minskning talabi bilan Belarusni tark etdi

Fransiya elchisi Nikolya de Buyyan de Lakost Minskning talabi bilan Belarusni tark etdi, deb yozadi “RBK”.

AFP boshqa tafsilotlarsiz tarqatgan ushbu ma’lumotni Belarus muxolifati yetakchisi Svetlana Tixanovskayaning maslahatchisi Franak Vyachorka tasdiqladi. “Elchi Lukashenkoga ishonch yorliqlarini topshirmadi va inson huquqlari buzilishlari haqida ochiqchasiga gapirdi”, — deb yozdi u Twitter’da.

Belarusning “Nasha Niva” nashri ham qayd etishicha, Parij Belarus prezidenti Aleksandr Lukashenkoga ishonch yorliqlarini topshirishni istamagani sababli, diplomat mamlakatni tark etishga majbur bo‘lgan.

Nikolya de Lakost 2020-yilda Fransiyaning Belarusdagi elchisiga aylangandi. O‘tgan yilning sentabrida diplomatik vakolatxona rahbari Lukashenkoga ishonch yorliqlarini topshirish marosimiga kelmadi. 8-dekabr kuni u yorliqlarning nusxalarini Belarus tashqi ishlar vaziri Vladimir Makeyga topshirdi.

Lukashenko avvalroq “Belarusning diplomatik ishtiroki istiqbollari ko‘zda tutilmayotgan” va respublika savdo aloqalari olib bormayotgan mamlakatlarda Belarus o‘z diplomatlari sonini minimumgacha yetkazishi kerakligini aytgandi. “Nima uchun o‘z elchixonalarimizni saqlab turishimiz, ularni ta’minlash uchun budjet mablag‘larini sarflashimiz kerak? Yumshoq qilib aytganda, pauzaga qo‘yilgan yo‘nalishlar uchun javob beruvchi diplomatlarning to‘liq shtati u yerda nimaga kerak?” — deya aniqlik kiritgandi prezident.

U bunday mamlakatlarda elchi va uning yordamchisini qoldirib, ular uchun ijaraga uy olish mumkinligini qayd etgandi. Hech bo‘lmaganda, bu mamlakatlar bilan masalalarni BMT va boshqa tashkilotlar maydonlarida muhokama qilish mumkin bo‘ladi.

Minskning Yevropa mamlakatlari bilan aloqalari Belarusda 2020-yil avgustida boshlangan prezident saylovidan keyin yomonlashdi. Markaziy saylov komissiyasi ma’lumotlari bo‘yicha unda Lukashenko g‘olib bo‘ldi, ammo muxolifat natijalar qalbakilashtirilganini da’vo qildi. Mamlakatda ommaviy noroziliklar bo‘lib o‘tdi, ular politsiya bilan to‘qnashuvlarga aylanib ketdi. Huquq himoyachilari va hibsga olinganlar Belarus kuch organlari tomonidan bo‘lgan qiynoqlar haqida ma’lum qildi. Yevroittifoq Belarusdagi saylov natijalarini tan olmayapti. Moskva Lukashenkoni qonuniy prezident deb hisoblaydi. Uning o‘zi qonuniy tarzda g‘olib bo‘lganini, respublikadagi noroziliklar esa chet elda turib tashkillashtirilayotganini aytgan.

Belarus va Yevropa mamlakatlari o‘rtasidagi munosabatlar yomonlashuviga 23-may kuni Belarus poytaxtiga Ryanair yo‘lovchi samolyoti majburan qo‘ndirilgani ham sabab bo‘ldi. U Afinadan Vilnyusga uchayotgan edi, biroq bortdagi bomda haqidagi xabar tufayli MInskka qo‘ndi. Ma’lumot tasdiqlanmadi, lekin samolyot qo‘nganidan keyin darhol Belarus huquq-tartibot organlari ikki yo‘lovchini — Nexta Telegram-kanali bosh muharriri Roman Protasevich (u Belarusda terrorchilar ro‘yxatiga kiritilgan) va uning sevgan qizi Sofya Sapegani qo‘lga oldi.

Yevroittifoq Belarusga to‘rt paket sanksiyalarni kiritdi, Minsk javob choralarini ko‘rdi. Xususan, u Yevroittifoqqa noqonuniy migratsiya bilan kurashda yordam berishdan bosh tortdi, shu tufayli mamlakatlar muhojirlar oqimi bilan to‘qnashdi.