Франция элчиси Минскнинг талаби билан Беларусни тарк этди

Франция элчиси Николя де Буйян де Лакост Минскнинг талаби билан Беларусни тарк этди, деб ёзади «РБК».

AFP бошқа тафсилотларсиз тарқатган ушбу маълумотни Беларусь мухолифати етакчиси Светлана Тихановскаянинг маслаҳатчиси Франак Вячорка тасдиқлади. «Элчи Лукашенкога ишонч ёрлиқларини топширмади ва инсон ҳуқуқлари бузилишлари ҳақида очиқчасига гапирди», — деб ёзди у Twitter’да.

Беларуснинг «Наша Нива» нашри ҳам қайд этишича, Париж Беларусь президенти Александр Лукашенкога ишонч ёрлиқларини топширишни истамагани сабабли, дипломат мамлакатни тарк этишга мажбур бўлган.

Николя де Лакост 2020 йилда Франциянинг Беларусдаги элчисига айланганди. Ўтган йилнинг сентябрида дипломатик ваколатхона раҳбари Лукашенкога ишонч ёрлиқларини топшириш маросимига келмади. 8 декабрь куни у ёрлиқларнинг нусхаларини Беларусь ташқи ишлар вазири Владимир Макейга топширди.

Лукашенко аввалроқ «Беларуснинг дипломатик иштироки истиқболлари кўзда тутилмаётган» ва республика савдо алоқалари олиб бормаётган мамлакатларда Беларусь ўз дипломатлари сонини минимумгача етказиши кераклигини айтганди. «Нима учун ўз элчихоналаримизни сақлаб туришимиз, уларни таъминлаш учун бюджет маблағларини сарфлашимиз керак? Юмшоқ қилиб айтганда, паузага қўйилган йўналишлар учун жавоб берувчи дипломатларнинг тўлиқ штати у ерда нимага керак?» — дея аниқлик киритганди президент.

У бундай мамлакатларда элчи ва унинг ёрдамчисини қолдириб, улар учун ижарага уй олиш мумкинлигини қайд этганди. Ҳеч бўлмаганда, бу мамлакатлар билан масалаларни БМТ ва бошқа ташкилотлар майдонларида муҳокама қилиш мумкин бўлади.

Минскнинг Европа мамлакатлари билан алоқалари Беларусда 2020 йил августида бошланган президент сайловидан кейин ёмонлашди. Марказий сайлов комиссияси маълумотлари бўйича унда Лукашенко ғолиб бўлди, аммо мухолифат натижалар қалбакилаштирилганини даъво қилди. Мамлакатда оммавий норозиликлар бўлиб ўтди, улар полиция билан тўқнашувларга айланиб кетди. Ҳуқуқ ҳимоячилари ва ҳибсга олинганлар Беларусь куч органлари томонидан бўлган қийноқлар ҳақида маълум қилди. Евроиттифоқ Беларусдаги сайлов натижаларини тан олмаяпти. Москва Лукашенкони қонуний президент деб ҳисоблайди. Унинг ўзи қонуний тарзда ғолиб бўлганини, республикадаги норозиликлар эса чет элда туриб ташкиллаштирилаётганини айтган.

Беларусь ва Европа мамлакатлари ўртасидаги муносабатлар ёмонлашувига 23 май куни Беларусь пойтахтига Ryanair йўловчи самолёти мажбуран қўндирилгани ҳам сабаб бўлди. У Афинадан Вильнюсга учаётган эди, бироқ бортдаги бомда ҳақидаги хабар туфайли МИнскка қўнди. Маълумот тасдиқланмади, лекин самолёт қўнганидан кейин дарҳол Беларусь ҳуқуқ-тартибот органлари икки йўловчини — Nexta Telegram-канали бош муҳаррири Роман Протасевич (у Беларусда террорчилар рўйхатига киритилган) ва унинг севган қизи Софя Сапегани қўлга олди.

Евроиттифоқ Беларусга тўрт пакет санкцияларни киритди, Минск жавоб чораларини кўрди. Хусусан, у Евроиттифоққа ноқонуний миграция билан курашда ёрдам беришдан бош тортди, шу туфайли мамлакатлар муҳожирлар оқими билан тўқнашди.