Saudiya Arabistonining Makka shahrida joylashgan dunyodagi eng yirik masjid — Al-Haromda 17-oktabr, yakshanba kuni pandemiya boshidan buyon birinchi marta ijtimoiy masofa choralariga rioya qilmagan holda namoz o‘qildi. Bu haqda “Interfaks” xabar bermoqda.
G‘arb OAVlari yozishicha, Al-Harom ishchilari to‘la-to‘kis ibodatlarni qayta tiklash haqidagi qarorga muvofiq, masjid polida ijtimoiy masofa saqlashga yordam beradigan maxsus stikerlarni olib tashlagan.
Matbuotda tarqalgan video va fototasvirlarga qaraganda, 17-oktabr kuni masjid namoz o‘quvchilar bilan maksimal darajada to‘lgan. Saudiya OAVlari qayd etishicha, endi choralar bekor qilinganidan keyin Makka Umra safari uchun keladigan chet elliklarni qabul qiladi.
Shu bilan birga, OAVlar Saudiya Arabistoni hukumatiga tayanib ta’kidlashicha, masjidga keluvchilar COVID-19 ga qarshi to‘liq emlangan bo‘lishi va uning hududida niqob taqishi shart. Bundan tashqari, tashrif buyuruvchilar uchun Ka’baga kirish hamon cheklangan holda qolmoqda.
Saudiya Arabistoni so‘nggi oylarda asta-sekinlik bilan normal hayotga qaytmoqda. 1-avgustdan qirollik koronavirusga qarshi to‘liq emlangan sayyohlarni qabul qila boshladi. Shuningdek, 17-oktabrdan emlangan sport muxlislari mamlakatning barcha o‘yingohlarida va boshqa sport obyektlarida sport tadbirlariga kirishi mumkin.
Avvalroq Saudiya Arabistoni hukumati chet elliklar kichik haj — Umra ziyoratini amalga oshirish uchun 10-avgustdan qirollikka kirishi mumkinligini e’lon qilgan edi.
Eslatib o‘tamiz, bu yil Haj ziyorati 17—22-iyul kunlari amalga oshirildi. Makkaga bu yil 60 ming ziyoratchi tashrif buyurishi mumkin bo‘ldi, ammo ular faqat qirollik fuqarolari va u yerda yashovchi shaxslardan iborat bo‘ldi, chet elliklar esa pandemiya tufayli ikkinchi yil ham Haj ziyoratiga qo‘yilmadi. Ziyoratchilarning barchasi 18—65 yoshda va koronavirusga qarshi emlangan bo‘lishi sharti qo‘yildi.
Saudiya Arabistoni 2020-yil oktabr oyidan boshlab mamlakatda yashovchi aholisi uchun Umra ziyoratini amalga oshirishga ruxsat bergan edi. Va o‘sha oy o‘rtalarida mamlakat hukumati yetti oy ichida birinchi marta Makkadagi Al-Harom masjidida namoz o‘qilishiga ruxsat berdi.
2020-yil noyabridan Saudiya Arabistoni asta-sekinlik bilan 50 yoshdan katta bo‘lmagan ziyoratchilarni manfiy natijali PZR-test bilan Umra ziyorati uchun kiritishni boshladi.
Izoh (0)