AQSh, Buyuk Britaniya, Shveysariya va Yaponiya shifokorlarining xabar qilishicha, butun dunyoda bolalar nafas yo‘llari kasalligini keltirib chiqaradigan kam o‘rganilgan respiratorli-sinsitial virusini (RSV) ommaviy yuqtira boshlagan.
AQShda Nyu-York kasalxonalaridan birining bolalar yuqumli kasalliklari bo‘limi boshlig‘i Rabiya Oganing so‘zlariga ko‘ra, yangi tug‘ilgan chaqaloqlar va bolalarda ushbu virusni yuqtirish holatlari aprel oyida ham qayd etilib, natijada reanimatsiya bo‘limlari qisqa vaqtda to‘lib ketgandi.
Olimlarning fikriga ko‘ra, RSV tarqalishiga koronavirus pandemiyasi ta’sir ko‘rsatgan, chunki karantin choralari tufayli bolalarda virusga qarshi immunitet shakllanmay qolgan. Koronavirus cheklovlari yumshatilgandan so‘ng esa RSV bilan kasallanish holatlari ortdi.
AQSh Kasalliklarni nazorat qilish va oldini olish markazi ma’lumotlariga ko‘ra, aksariyat bolalarda virus burun shilliq qavatining yallig‘lanishi va yo‘talli shamollash kabi yengil o‘tadi. Ammo ba’zilarda bronxiolit — o‘pka pastki qismining shamollashiga olib kelishi mumkin.
Iyun oyida Hindistonda koronavirusdan tuzalgan bolalarda o‘limga olib keladigan yallig‘lanish sindromi tarqalgandi. O‘shanda mamlakat bo‘ylab COVID-19 dan tuzalgan bolalarda multisistemali yallig‘lanish sindromi (MIS-C)ga chalinish bo‘yicha 2000 dan ortiq holat qayd etilgan. Mazkur sindromga uchragan bolalarning 70 foizga yaqini intensiv terapiyaga muhtoj ekani aytilgan.
Izoh (0)