Hindistonda COVID-19’dan tuzalgan bolalar orasida xavfli yallig‘lanish sindromi qayd etildi

Hindistonda koronavirusdan tuzalgan bolalarda o‘limga olib keladigan yallig‘lanish sindromi tarqaldi, deb yozadi Daily Mail nashri.

Xabarga ko‘ra, mamlakat bo‘ylab COVID-19’dan tuzalgan bolalarda multisistemali yallig‘lanish sindromi (MIS-C)ga chalinish bo‘yicha 2000 dan ortiq holat qayd etilgan. Ayni paytda mazkur sindromga uchragan bolalarning 70 foizga yaqini intensiv terapiyaga muhtoj.

Qayd etilishicha, MIS-C asosan, 5 yoshdan 15 yoshgacha bo‘lgan bolalarga ular koronavirus bilan kasallanganidan ikki-olti hafta o‘tgach ta’sir qiladi. Kasallik birinchi navbatda yuqori isitma shaklida rivojlanib, organlarning yallig‘lanishiga olib keladi. Bu kamdan kam uchraydi va simptomlarsiz kechgan infeksiyadan so‘ng rivojlanishi mumkin.

“Sindrom yurak, nafas olish yoki buyrak yetishmovchiligiga olib kelishi mumkin. Sog‘ayishi uchun uzoq vaqt talab qilinadigan bolalarda hayot darajasi sindromning organlarga qanchalik yomon ta’sir qilganiga bog‘liq. Kasallikni hali davolash oson bo‘lgan dastlabki bosqichdayoq qo‘lga olish juda muhimdir”, — dedi Dehlidagi “Xardinj ledi” tibbiyot kolleji pediatriya bo‘limi direktori doktor Xarish Pemde. Uning ta’kidlashicha, MIS-C o‘limga olib kelishi mumkin, chunki u ko‘plab organ tizimlariga ta’sir qiladi.

Tadqiqotlar shuni ko‘rsatdiki, COVID-19 bilan bog‘liq bo‘lgan MIS-C noyob yallig‘lanish kasalligini tanasida rivojlantiradigan barcha bolalarning yarmida nevrologik belgilar mavjud. Eng tez-tez uchraydigan alomat bosh og‘rig‘i bo‘lgan, ammo bolalarda gallyutsinatsiya yoki tutqanoq kabi yanada jiddiy ikkilamchi ta’sirlar paydo bo‘lishi mumkin.

MIS-C dastlab qon tomirlari devorlarining yallig‘lanishini keltirib chiqaradigan va asosan 5 yoshgacha bo‘lgan bolalarga ta’sir qiladigan Kavasaki kasalligi bilan bog‘liq deya taxmin qilingan. MIS-C bo‘yicha ilk holatlar Buyuk Britaniya, Italiya va Ispaniyada 2020-yilning aprelida qayd etilgan. Mutaxassislarning ta’kidlashicha, MIS-C tashxisi qiyin bo‘lgan, chunki uning ko‘plab belgilari, jumladan, toshmalar, isitma va oshqozon-ichak buzilishi boshqa bolalar kasalliklariga o‘xshashdir.

Multisistemali yallig‘lanish sindromining boshqa alomatlariga — toshma, yiring chiqmasdan ko‘z shilliq pardasining yallig‘lanishi yoki yallig‘lanishining boshqa ko‘rinishlari, qon bosimining tushib ketishi yoki shok, koagulopatiya belgilari kiradi. Davolashda immunoglobulin terapiyasi va kortikosteroidlar qo‘llaniladi. Sindrom kamdan kam uchrasa-da, bu bola uchun virusning o‘ziga qaraganda ancha xavfli bo‘lishi mumkin.

Eslatib o‘tamiz, Hindistonda COVID-pandemiya fonida odamlarning xavfli zamburug‘larga chalinish holatlari ko‘paydi. Mamlakatda koronavirus tarqalishining ikkilamchi ta’siri sifatida paydo bo‘lgan qora zamburug‘ epidemiyasi fonida yana bir zamburug‘ kasalligi aniqlandi, u mamlakatda oq zamburug‘ deb ataladi.

May oxirida Hindiston shifokorlari koronavirusga chalingan bemorda zamburug‘ infeksiyasining uchinchi turi — sariq zamburug‘ni aniqladi. Mamlakatda sariq zamburug‘ bilan kasallangan birinchi bemor vafot etdi.