АҚШ, Буюк Британия, Швейцария ва Япония шифокорларининг хабар қилишича, бутун дунёда болалар нафас йўллари касаллигини келтириб чиқарадиган кам ўрганилган респираторли-синситиал вирусини (RSV) оммавий юқтира бошлаган.
АҚШда Нью-Йорк касалхоналаридан бирининг болалар юқумли касалликлари бўлими бошлиғи Рабия Оганинг сўзларига кўра, янги туғилган чақалоқлар ва болаларда ушбу вирусни юқтириш ҳолатлари апрель ойида ҳам қайд этилиб, натижада реанимация бўлимлари қисқа вақтда тўлиб кетганди.
Олимларнинг фикрига кўра, RSV тарқалишига коронавирус пандемияси таъсир кўрсатган, чунки карантин чоралари туфайли болаларда вирусга қарши иммунитет шаклланмай қолган. Коронавирус чекловлари юмшатилгандан сўнг эса RSV билан касалланиш ҳолатлари ортди.
АҚШ Касалликларни назорат қилиш ва олдини олиш маркази маълумотларига кўра, аксарият болаларда вирус бурун шиллиқ қаватининг яллиғланиши ва йўталли шамоллаш каби енгил ўтади. Аммо баъзиларда бронхиолит — ўпка пастки қисмининг шамоллашига олиб келиши мумкин.
Июнь ойида Ҳиндистонда коронавирусдан тузалган болаларда ўлимга олиб келадиган яллиғланиш синдроми тарқалганди. Ўшанда мамлакат бўйлаб COVID-19 дан тузалган болаларда мултисистемали яллиғланиш синдроми (MIS-C)га чалиниш бўйича 2000 дан ортиқ ҳолат қайд этилган. Мазкур синдромга учраган болаларнинг 70 фоизга яқини интенсив терапияга муҳтож экани айтилган.
Изоҳ (0)