“Tolibon” Afg‘onistonda Ayollar masalalari bo‘yicha vazirlikni tugatdi

“Tolibon” Afg‘onistonda Ayollar masalalari bo‘yicha vazirlikni tugatib, uning o‘rniga Saxovatni targ‘ib qilish va illatlarni yo‘qotish vazirligini tuzdi. Bu haqda BBC xabar berdi.

Ta’kidlanishicha, 1990-yillarda “Tolibon” hukmronligi davrida vazirlik ayollarga nisbatan qat’iy shariat qoidalarini va keskin cheklovlarni joriy qilgan edi. Ilgari Saxovatni targ‘ib qilish va illatlarni yo‘qotish vazirligi esa ko‘chalarda shariat qoidalariga rioya qilinishini ta’minlash uchun axloq politsiyasini tashkil etishga javobgar bo‘lgan.

“Tolibon” hokimiyat tepasiga kelganidan buyon ayollarning ta’lim olishi va davlat lavozimlarida ishlashi taqiqlandi.

Anadolu agentligi qayd etishicha, 17-sentabr kuni Afg‘oniston Sog‘liqni saqlash vazirligi mamlakatda o‘g‘il bolalar maktabda o‘qish huquqiga ega bo‘lishini e’lon qildi, ammo muassasa qiz bolalarning ta’lim olish huquqini tilga olmadi.

Shundan keyin Kobulda bo‘lib o‘tgan jimjitlik aksiyasi tashkilotchisi Farah Mustafaviyning aytishicha, yangi qarorga muvofiq, qizlar maktabda faqat oltinchi sinfgacha o‘qishi mumkin bo‘ladi.

“Bundan tashqari, ayollar mehnat qilishi mumkin bo‘lgan ish joylarini yopib tashlashdi. Ta’lim olish — ayollarning diniy va fuqarolik huquqi. Islom ham, Olloh ham bizni bu huquqdan mahrum qilmagan”, — dedi u.