Benksining “Pufakli qiz” surati 2018-yilda Sotheby’s auksionida sotilishi bilan gardishiga o‘rnatilgan shreder yordamida qisman yo‘q qilingan edi. Kimoshdi uyining ma’lum qilinishicha, kartinaning omon qolgan qismi 14-oktabrda bo‘lib o‘tadigan savdolarga qo‘yiladi, deb yozadi Esquire.
Mazkur kartina hozirda 5,5—8,3 million dollarga baholanmoqda. Birinchi bor 1,4 million dollarga sotilgan edi. Bloomberg prognozlariga ko‘ra, keyingi auksionda Benksining ijod mahsuli 8,3 million dollarga sotilishi mumkin. Bu kabi holatda uning narxi uch yil ichida 500 foizga oshgan bo‘ladi.
2018-yilning oktabrida Benksining eng mashhur ishlaridan biri final bolg‘asi urilishi bilan kartina gardishidagi shreder yordamida yo‘q qilina boshlagandi. Keyinroq kartina muallifi ushbu spektaklni o‘zi o‘ylab topganini ma’lum qilgan. O‘zining kimligini oshkor etishni istamagan xaridor art-obyektni o‘zida qoldirishi istagan, biroq uni “Chiqindi idishdagi sevgi” deya qayta nomlagan.
“Uch yil oldin syurrealistik kechada tasodifan, lekin imtiyozlarga boy ‘Chiqindi idishdagi sevgi’ning egasiga aylandim. Bu aqlbovar qilmas tajriba bo‘ldi — dunyodagi eng mashhur san’at asarlaridan birining paydo bo‘lish tarixining bir qismiga aylanish, ammo endilikda kartinani qo‘yib yuborish vaqti keldi”, — deydi san’at asarining hozirgi egasi.
Avvalroq Nyu-Yorkda Benksining asari 95 ming dollarga sotib olindi va kriptovalyutaga aylantirish maqsadida yoqib yuborilgandi.
Izoh (0)