Ermitaj muzeyi “Sizning tokeningiz Ermitajda” loyihasi doirasida Binance kriptovalyutasi orqali muzey kolleksiyasidan o‘rin olgan beshta kartinaning NFT-tokenlarini sotadi. Bu haqda muzey saytiga tayanib Esquire xabar berdi.
Auksion orqali Leonardo da Vinchining “Madonna Litta”, Jorjonening “Yudif”, Vinsent Van Gogning “Nastarin butasi”, Vasiliy Kandinskiyning “VI kompozitsiya”, Klod Monening “Monjerondagi bog‘ burchagi” kartinalarining nusxasi sotiladi. San’at asarlari barchasining raqamli nusxalari ikki nusxada yaratilgan: ulardan biri Ermitajda qoladi, ikkinchisi esa Binance’da sotiladi. Nusxalarda sana, vaqt va joyni Ermitaj bosh direktori Mixail Piotrovskiy imzolagan. Xaridor ularni imzolash jarayoni tasvirlangan videoni ham qo‘lga kiritadi.
Har bir lotning boshlang‘ich narxi 10 ming dollarni tashkil etadi. Hozirda Anonymous_8qko niki ostidagi foydalanuvchi “Madonna Litta” kartinasiga 15 ming dollar to‘lashga tayyor.
Auksion 7-sentabr kuni Moskva vaqti bilan soat 15:00 ga qadar davom etadi. Sotuvdan tushgan mablag‘larning barchasi muzeyga yo‘naltiriladi.
Avvalroq AQShda 10 soniyali videorolik 6,6 million dollarga, Sotheby’s auksioni orqali raqamli avatar 11,7 million dollarga sotilgani to‘g‘risida xabar berilgandi.
Mavzuga doir: Toshning NFT-surati 1,3 mln dollarga sotildi
Izoh (0)