Ko‘ksaroyda 30-avgust, dushanba kuni bo‘lib o‘tgan bir guruh turli soha vakillarini taqdirlash marosimida Prezident Shavkat Mirziyoyev O‘zbekiston va Qoraqalpog‘iston Respublikasi xalq artisti Muhammadali Abduqunduzovga “Mehnat shuhrati” ordenini topshirdi. Aktyor o‘z navbatida davlat rahbariga minnatdorchilik so‘zlarini bildirdi. Bu haqda “Daryo” muxbiri xabar bermoqda.
“Bu mukofotni yurtimizda olib borilayotgan yuksalishlarda faolroq bo‘lish uchun menga berilgan ishonch yorlig‘i, deb bilaman. Oxirgi mukofotni olganimga 25 yil bo‘ldi. Ijod qilaman, millionlab muxlislarim bor, lekin negadir yuqoridan e’tibor kamroqdek tuyulib qolgan edi. Umidim jamlangan hovuz quriy deb boshlagan bir paytda Alloh menga sizni sababchi qildi, siz meni ushbu yuksak mukofotga loyiq ko‘rdingiz. Sizga ming bora qulluq. Sizning sa’y-harakatingiz bilan tilimizda ‘Renessans’, ‘Yangi O‘zbekiston’, degan so‘zlar paydo bo‘ldi.
Bugun yurtimizda ulkan ijtimoiy-iqtisodiy islohotlar bo‘lyapti. Demokratiya o‘zining yangi cho‘qqisiga chiqdi va eng muhimi Yangi O‘zbekistonimizda adolat fasli hukm surmoqda. Biz uning bardavom bo‘lishini xohlaymiz. Odatda tabiatda fasl o‘zgarib turadi, ammo biz istardikki, ana shu adolat fasli bardavom bo‘lsin.
Hurmatli Prezident, siz Bobur hazratlarining ijodi, uning merosini juda yaxshi bilasiz, qadrlaysiz. 2017-yilda ziyolilar bilan uchrashuvda Bobur haqida juda iliq gaplar aytgan edingiz. Andijonda ham ko‘p iliq gaplar eshitdik u zot haqida.
Mana shu buyuk zotning hikmatli so‘zlari bor: ‘Bu foniy dunyoda inson nomi to‘rt narsada abadiy qoladi: yozilgan kitoblarda, qurilgan imoratlarda, ekilgan daraxtlar hamda komil farzandlarda’. Agar hazratning ushbu so‘zlarini Yangi O‘zbekistonimizga qiyos etsak, bugun yurtimizda kitoblar yozilyapti, obidalar ko‘kka bo‘y cho‘zyapti, mana, Islom sivilizatsiyasi markazi, sizning rahbarligingizda tamal toshi qo‘yilgan O‘zbek milliy akademik drama teatrining yangi binosi, bog‘lar barpo etilyapti, solih farzandlar kamol topyapti. Demak, Yangi O‘zbekistonimizning umri abadiylikka daxldor ekanligiga har birimiz iymon keltiramiz. Biz belimizni mahkam bog‘lab, Yangi O‘zbekistonni yaratish yo‘lida yoningizda har doim kamarbasta bo‘lamiz”, — dedi aktyor.
Izoh (0)