O‘zbekiston Islom taraqqiyot bankiga bundan 18 yil avval a’zo bo‘lgan. Bu haqda ayni paytda Toshkentda bo‘lib o‘tayotgan Islom taraqqiyot banki Boshqaruv kengashining 46-yillik anjumanida ishtirok etayotgan Prezident Shavkat Mirziyoyev qayd etdi, deya xabar bermoqda “Daryo” muxbiri.
Ayni vaqtda yurtimizning Islom dunyosi bilan aloqalari ming yildan ziyod tarixga egadir. Asrlar davomida O‘zbekiston zamini musulmon olamining buyuk va noyob madaniyati, ilm-fani va ijtimoiy-iqtisodiy taraqqiyotining markazlaridan biri bo‘lganidan sizlar, albatta, xabardorsiz. Qadimiy O‘zbekiston, ya’ni Movarounnahr diyori Islom dunyosining yuksak madaniyati va sivilizatsiyasi rivojiga unutilmas hissa qo‘shgan alloma va mutafakkirlar yurtidir.Bugun buyuk ajdodlarimiz an’analarini davom ettirgan holda, biz Islom olami bilan mushtarak qadriyatlarimizni asrab-avaylash va yanada rivojlantirish borasida katta ishlarni amalga oshirmoqdamiz.
Jumladan, so‘nggi yillarda imom al-Buxoriy nomidagi Xalqaro hadisshunoslik markazi, Islom sivilizatsiyasi markazi va Xalqaro islom akademiyasini tashkil etdik. Shuningdek, yangi turdagi ta’lim maskanlari, xususan, Prezident maktablari, ijod maktablari, ixtisoslashgan maktablar faoliyati yo‘lga qo‘yilmoqda.
Birgina 2020-yilda yurtimizda matematika fani bo‘yicha 56 ta, kimyo-biologiya fani bo‘yicha 28 ta, informatika va axborot-kommunikatsiya texnologiyalari bo‘yicha 14 ta ana shunday maktablar tashkil etildi. Yurtimizda so‘nggi 5 yilda 64 ta yangi oliy ta’lim dargohi ochilib, ularning soni 141 taga yetkazildi. Birlashgan Arab Amirliklari hukumati bilan birgalikdagi ‘Bir million dasturchi’ loyihasi doirasida qariyb 600 ming yoshlarimizga zamonaviy axborot texnologiyalari bo‘yicha chuqur bilim berilmoqda.
Shavkat Mirziyoyev, O‘zbekiston Prezidenti
Izoh (0)