Toshkent shahar IIBB poytaxt ustunlariga o‘rnatilgan davlat bayroqlarini o‘zboshimchalik bilan yechib olib, mashinalariga o‘rnatayotgan shaxslar javobgarlikka tortilishi mumkinligini ma’lum qildi.
Ma’lum qilinishicha, 1-sentabr kuni poytaxtning bir nechta tumanlarida transport vositalarining haydovchilari va yo‘lovchilari bayram munosabati bilan hokimiyat tomonidan o‘rnatilgan davlat bayroqlarini o‘zboshimchalik bilan yechib olgan. Ular ushbu bayroqlarni o‘zlarining avtomashinasiga o‘rnatib, bayramni nishonlamoqchi bo‘lgan.
Biroq bayroqlar transport vositasiga mustahkamlab o‘rnatilmagan, transport vositasidan tashqariga chiqib turishi esa avtomashinada harakatlanish chog‘ida noqulayliklar tug‘dirib, harakat xavfsizligiga tahdid solgan. Shuningdek, ushbu holatlar fuqarolar tomonidan davlat ramzlari va davlat mulki to‘g‘risidagi qonun talablarining buzilishiga olib kelgan.
“Bu kabi huquqbuzarliklarni sodir etgan shaxslar Ma’muriy javobgarlik to‘g‘risidagi kodeksning 203-1-moddasiga ko‘ra (davlat ramzlari to‘g‘risidagi qonunchilikni buzish) ma’muriy javobgarlikka tortilishi mumkinligini unutmang. Vatanparvarlik o‘z vataningiz qonunlariga nisbatan hurmatsizlik bilan munosabatda bo‘lishda namoyon etilmasligi kerak. Vatanparvarlikni qonunlarga rioya etgan holda namoyon qiling”, — deyiladi idora munosabatida.
IIV YHXBB axborot xizmatining ma’lum qilishicha, 1-sentabr kuni poytaxt ko‘chalaridagi ustunlarga o‘rnatilgan davlat bayrog‘ini yechib, transport vositalariga ilgan holda yo‘l harakati qoidalarini chetlab o‘tib, guruh-guruh bo‘lib, turli xavfli manyovrlar qilib harakatlangan haydovchilar bilan tushuntirish ishlari olib borilgan.
Izoh (0)