Britaniyaning Kent grafligida o‘ziga xos rekord o‘rnatgan haydovchining videosi tarqaldi. U mashinani avtoturargohdagi belgilangan joyga joylashtirish uchun sakkiz daqiqa sarflab, o‘nta urinishni amalga oshirgan. Natijada o‘jar Toyota haydovchisi o‘z maqsadiga erishgan, deb xabar beradi Motor.
Virus kabi tarqalgan rolik muallifi balkoni avtoturargohga qaragan Andrey Dalka ismli kishi bo‘ladi. Orqaga yurib, avtoturargohga joylashish maqsadida g‘alati harakat qilayotgan Toyota uning e’tiborini tortgan.
Videodan ko‘rish mumkinki, britaniyalik turargohning to‘rtta turli joyida o‘zini sinab ko‘rgan, ammo har safar nimadir noto‘g‘ri ketgan: chiziqdan mashinaning yo quyruq qismi, yoki old qismi chiqib qolavergan. Shu bilan birga, u burilib olib, oldi bilan kirishga yoki bo‘sh joy ko‘pligiga qaramay, eshikni ochishga urinmagan.
Natijada Toyota haydovchisi oxir-oqibat mashinasini to‘g‘ri joylashtirgan va bunga sakkiz daqiqa vaqt sarflagan. Guvohning so‘zlariga ko‘ra, uning “qiynalishi”ni tomosha qilish bir vaqtning o‘zida ham kulgili, ham xavotirli bo‘lgan: potensial xavfli haydovchi qanday qilib haydovchilik guvohnomasini olgani noma’lum.
Avvalroq Britaniyada Audi yo‘l bo‘yidagi uylardan biriga urilib, o‘zi bilan kirish eshigini “olib ketgani” to‘g‘risida xabar berilgandi.
Izoh (0)