Moskva viloyatidagi Dolgoprudniy shahrida noodatiy ko‘ngilsiz hodisa sodir bo‘ldi: Mercedes-Benz ko‘p qavatli avtomobillar turargohining devorini teshib chiqdi. To‘rtinchi qavatda osilib turgan sedanning videosi ijtimoiy tarmoqlarda tarqalgan, deb xabar beradi Motor.

Kadr: Telegram / Baza

Ma’lumotlarga ko‘ra, avtomobilni ayol kishi boshqarayotgan bo‘lgan. 27-yanvar tongida u “Raketa quruvchilar” shoh ko‘chasidagi avtoturargohga kirgan, biroq tezlikning hisobini ololmagan yoki gaz va tormoz tepkilarini chalkashtirib yuborgan.

Natijada Mercedes-Benz bino devorini teshib o‘tgan va mo‘jiza sababli tashqariga qulab tushmagan — aftidan, haydovchi vaqtida tormozni bosishga ulgurib qolgan.

YTH joyidan olingan videoga ko‘ra, nemis sedani g‘ishtli devor bilan to‘qnashuvda o‘zini “mardonavor” tutgan va hatto pachoqlanmagan. Ma’lum qilinishicha, haydovchiga ham hech qanday zarar yetmagan. Oradan bir soat o‘tgach Mercedes chiqarib olingan, biroq devorda hosil bo‘lgan teshik hamon turibdi.

Avvalroq Britaniyada Audi yo‘l bo‘yidagi uylardan biriga urilib, o‘zi bilan kirish eshigini “olib ketgani” to‘g‘risida xabar berilgandi.