Tojikiston Favqulodda vaziyatlar qo‘mitasi mamlakatda 10-iyul kuni yuz bergan zilzilada halok bo‘lganlarning ismlari hamda zilzila oqibatlari to‘g‘risida dastlabki ma’lumotlarni e’lon qildi, deb yozmoqda Asia-Plus.
Qo‘mita ma’lumotlariga ko‘ra, zilzila episentri Dushanbedan 165 kilometr uzoqlikda shimoli-sharqda, Rasht tumanidan 21 kilometr uzoqlikda sharqda joylashgan. Zilzila epitsentrida yer silkinishi kuchi 5-6 ballni, Dushanbeda 2-3 ballni tashkil etgan.
Hodisa oqibatida Tojikobod tumanining Langari Shoh qishloq jamoatida 5 kishi halok bo‘lgan, 16 kishi turli xil jarohatlar bilan kasalxonaga yotqizilgan.
Favqulodda vaziyatlar qo‘mitasida keltirilishicha, zilzila Firdavs Mirzoshoyev (2007-yilda tug‘ilgan), Ayziddin Kukanov(2014), Turon Maxmaduloyeva (1951), Robiya Bululova(2017), va Qadriddin Boymurodov(2015)ning hayotiga zomin bo‘lgan.
Dastlabki ma’lumotlarga ko‘ra, yerosti silkinishlari natijasida Tojikobod tumani, Sarichashma jamoati Langari Shoh qishlog‘ida 29 ta uyga zarar yetgan: ularning 7 tasi to‘liq, 10 tasi qisman vayron bo‘lgan, 12 tasi jiddiy shikastlanmagan.
Rasht tumanidagi Favqulodda vaziyatlar boshqarmasi ma’lumotlariga ko‘ra, tumandagi 14 ta uy zilzila natijasida butunlay, yana 131 uy qisman vayron bo‘lgan. Askalon jamoatining qishloqlarida 53 uy zarar ko‘rgan, Sangvor tumani Sangvor jamoatining Hayron qishlog‘ida esa ikkita uy: bittasi to‘liq, ikkinchisi qisman qulagan. Favqulodda vaziyatlar qo‘mitasi ta’kidlashicha, respublika komissiyasi hozirda joylarda ish olib bormoqda.
O‘zbekiston hududida ham 10-iyul kuni tongda 3-4 balli zilzila sezilgan. Bundan avval 30-iyun kuni Qarshi shahrida 3 ballik zilzila qayd etilgandi.
Izoh (0)