Yevropa chegara agentligi (Frontex) muhojirlar oqimining ko‘payishi munosabati bilan Litva va Belarus chegaralarida shoshilinch operatsiya o‘tkazilishini e’lon qildi. Vilnyus yordam haqida 10-iyul kuni Bryusselga rasmiy so‘rov yubordi, deb yozmoqda “RBK”.
Litva chegarachilariga yordam berish uchun esa Frontex 1-iyuldan mamlakatga mutaxassislar va jihozlarni yuborishni boshlagandi.
“Litva va Belarus chegarasidagi vaziyat xavotirli bo‘lib qolmoqda. Men Yevropa Ittifoqining tashqi chegarasini mustahkamlash uchun tezkor chegara aralashuvini amalga oshirishga qaror qildim”— dedi Yevropa Ittifoqi chegara agentligining ijrochi direktori Fabris Leggeri.
Uning so‘zlariga ko‘ra, chegarachilar, patrul mashinalari, shuningdek, xodimlarning qo‘shimcha kuchlari Belarus—Litva chegarasiga muhojirlar bilan muzokaralar olib borish va ularning jinoiy tashkilotlarga aloqasi to‘g‘risida ma’lumot to‘plash uchun yuboriladi.
Frontex ma’lumotlariga ko‘ra, birgina iyul oyining dastlabki haftasida Litva hukumati Belarus bilan chegaraning noqonuniy kesib o‘tilishi bo‘yicha 800 dan ortiq holatni qayd etdi.
Avvaliga muhojirlarning aksariyati Iroq, Eron va Suriyadan kelgan bo‘lsa, yaqinda rasmiylar migratsiya oqimlari tarkibidagi o‘zgarishlarni payqadi. Iyul oyidagi muhojirlarning aksariyati Kongo Respublikasi, Gambiya, Gvineya, Mali va Senegaldan kelgan.
10-iyul, shanba kuni Litva prezidenti Gitanas Nauseda va agentlik rahbari Fabris Leggeri o‘rtasida muzokaralar bo‘lib o‘tdi. Nauseda Yevropa agentligi Litvaga bir nechta vertolyot yuborishini ma’lum qildi.
Keyinchalik Polshaga tashrifi chog‘ida Nauseda migrantlarni Lukashenkoning “siyosiy quroli” deb atadi. “Biz Belarus rejimining muhojirlardan siyosiy qurol sifatida foydalanishiga yo‘l qo‘ymaymiz”, — deb ta’kidladi Litva prezidenti.
Litva ma’lumotlariga ko‘ra, 2021-yil boshidan beri Belarus bilan chegarada Iroq, Kongo, Kamerun, Gvineya, Eron va boshqa mamlakatlar fuqarolarini o‘z ichiga olgan 1577 muhojir qo‘lga olingan. 2-iyul kuni Litva hukumati favqulodda holat e’lon qildi.
So‘nggi oylarda Belarus hududidan chegarani noqonuniy kesib o‘tayotganlar soni qariyb 20 baravarga oshdi. Belarus prezidenti Aleksandr Lukashenko Yevropa sanksiyalariga javoban uning mamlakati endi noqonuniy migratsiyaga qarshi kurashda Yevroittifoqqa yordam bermasligini aytgach, vaziyat shunday tus oldi. Sanksiyalar Ryanair samolyotining Minskka majburiy qo‘ndirilishi yuzasidan kiritilgan edi.
Avvalroq Litva noqonuniy muhojirlar oqimi tufayli Belarus bilan chegarada devor qurishini ma’lum qilgandi. Litva va Belarus o‘rtasidagi chegara uzunligi 678,8 kilometrni tashkil qiladi. Hozirda chegaraning 78 kilometrlik qismiga devor o‘rnatilgan. Taxminan 92,5 kilometr masofaga devor o‘rnatish mumkin emas, chunki u yerda chegara suv havzalari orqali o‘tadi. Shunday qilib, chegaraning 508 kilometr qismiga devor o‘rnatish kerak bo‘ladi.
Izoh (0)