Rossiyaning Mozori-Sharifdagi bosh konsulligi diplomatlari Afg‘onistondagi vaziyatning og‘irlashishi sababli O‘zbekistonga ko‘chirildi. Bu haqda Rossiya prezidentining Afg‘oniston bo‘yicha maxsus vakili, Tashqi ishlar vazirligining Osiyo ikkinchi departamenti rahbari Zamir Kabulovning so‘zlariga asoslanib, “TASS” xabar bermoqda.
Ta’kidlanishicha, konsullik xodimlari afg‘on-o‘zbek chegarasi yaqinidagi Xayraton shahrida fuqarolarni qabul qilishni davom ettiradi.
“Xodimlarimiz xavfsizligi uchun biz ularni vaqtincha O‘zbekiston hududiga olib keldik”, — deydi Kabulov.
Diplomat ayni paytda Kobuldagi elchixonadagi rossiyalik diplomatlarga hech narsa tahdid solmayotganini ta’kidladi.
Bundan avval O‘zbekiston chegarasini 20 kun ichida qancha afg‘onistonlik buzib o‘tgani ma’lum qilingani, Avstraliya o‘z qo‘shinlarini Afg‘onistondan olib chiqib ketgani hamda “Tolibon” Moskvadagi muzokaralarda Markaziy Osiyo davlatlari chegaralarini buzmaslikka va’da bergani haqida xabar berilgandi.
Izoh (0)