Turkmaniston Tashqi ishlar vazirligi matbuot xizmati Afg‘oniston chegarasidagi vaziyat yuzasidan bayonot berdi hamda Rossiya ommaviy axborot vositalarini noto‘g‘ri axborot tarqatishda aybladi.
TIV matbuot xizmatining xabar berishicha, so‘nggi kunlarda bir qator Rossiya OAVlari “turkman-afg‘on chegarasidagi vaziyatga oid tekshirilmagan va ochiqdan ochiq noxolis xabarlarni” tarqatmoqda.
“Xususan, ‘RBK’ telekanali Afg‘oniston bilan chegaraga Turkmanistonning harbiy texnikasi va artilleriyasining jalb qilinishi haqida haqiqatga to‘g‘ri kelmaydigan axborotlarni tarqatdi, bu esa arzon shov-shuv ortidan quvib, yolg‘on ma’lumot tarqatishdan boshqa narsani anglatmaydi”, — deyiladi xabarda.
Tashqi ishlar vazirligining ta’kidlashicha, ikki qo‘shni davlat va ularning xalqlari o‘rtasidagi birodarlik munosabatlari tufayli turkman-afg‘on chegarasi do‘stlik va hamkorlik chegarasi hisoblanadi.
Turkmaniston Mudofaa vazirligining bayonotlariga ko‘ra, uning tasarrufidagi barcha harbiy qismlar, ularning shaxsiy tarkibi va harbiy texnikasi doimiy joylashgan joyida turibdi va rejalashtirilgan dasturga muvofiq rejalashtirilgan mashg‘ulotlarni davom ettirmoqda.
“Azaliy yaxshi qo‘shnichilik an’analariga muvofiq, shuningdek, xalqaro huquqning buzilmas tamoyillari va ikki tomonlama shartnomalarda mustahkamlangan majburiyatlarni qat’iyan bajargan holda, Turkmaniston qardosh Afg‘oniston bilan tinch va yaxshi qo‘shnichilik aloqalarini saqlash va mustahkamlashga intilmoqda”, — deyiladi Turkmaniston Tashqi ishlar vazirligi xabarida.
“Xronika Turkmenistana” gazetasi 9-iyul kuni “Tolibon” harakati vakillari Turkmaniston bilan chegara hududidagi Afg‘onistonning Turgundi shahrini egallab olgani haqida xabar bergandi.
Shaharni egallab olish vaqtida ikki tomon, ya’ni Afg‘oniston hukumatiga qarashli qo‘shin hamda “Tolibon” vakillari minomyot va granatomyotlardan foydalangan. Snaryadlarning parchalari Turkmaniston hududiga ham uchib tushgani aytilmoqda. Turkmaniston milliy xavfsizlik vazirligi vakillari Turgundi hududini egallagan “Tolibon” a’zolari bilan muzokaralar olib borayotgani xabar qilingan.
Avvalroq “Tolibon” vakillarining Moskvaga muzokaralar uchun borgani haqida xabarlar tarqalgan. Uchrashuvda harakat vakillari Rossiyaga Afg‘oniston tomondan chegarani buzib, Markaziy Osiyodagi boshqa mamlakatlar hududiga kirmasliklari haqida va’da bergan.
Turkmaniston prezidenti Gurbanguli Berdimuhamedov 1-iyul kuni Xavfsizlik kengashining kengaytirilgan yig‘ilishini o‘tkazgan, unda Afg‘oniston bilan chegara hududidagi harbiy safarbarlik kuchaytirilishi qayd etilgan.
Shuningdek, 5-iyul kuni Tojikiston prezidenti Emomali Rahmon tojik-afg‘on chegarasini mustahkamlash uchun armiya rezervidagi 20 ming nafar harbiy xizmatchini safarbar etgan, 8-iyulda esa Tojikiston Afg‘oniston bilan chegaraga qo‘shimcha qo‘shinlarni yuborishi, chegarani yanada mustahkamlash uchun zaxiradagi yana 20 ming harbiyni safarbar qilishi haqida xabar berilgan.
Izoh (0)