SpaceX rahbari Ilon Mask britaniyalik milliarder Richard Brensonni koinot chegarasiga muvaffaqiyatli parvozi bilan tabrikladi, deb yozmoqda “RBK”.
“Tabriklaymiz, ajoyib parvoz!” — deb yozdi Mask Brensonning posti ostidagi izohida.
Mask Brenson bilan parvozdan oldin uchrashgan va uni qo‘llab-quvvatlashini bildirgan. Keyinchalik Brenson Mask bilan tushgan fotosuratini joylashtirib, unga quyidagicha izoh berdi: “Oldinda buyuk kun bor. Tongni do‘stingiz bilan boshlash qanday yaxshi”.
Amazon asoschisi Jeff Bezos ham Brensonga o‘z tabriklarini yo‘lladi. “Klubga qo‘shilishni intiqlik bilan kutmoqdaman”, — deb yozgan u Instagram’da.
Virgin Galactic kompaniyasi asoschisi Richard Brenson 11-iyul kuni VSS Unity suborbital raketoplanida koinotga muvaffaqiyatli parvozni amalga oshirib, kosmik turizm davrini boshlab berdi.
Jeff Bezos 20-iyul kuni Blue Origin kompaniyasining kosmik kemasida ukasi Mark Bezos bilan suborbital parvozni amalga oshiradi. Shuningdek, Bezos 82 yoshli amerikalik uchuvchi ayol Uolli Fankni o‘zi bilan birga koinotga uchishga taklif qilgan.
Blue Origin va Virgin Galactic — o‘zaro raqobatchi, ikkalasi ham kosmik turizmni rivojlantirishni rejalashtirmoqda.
SpaceX rahbari Ilon Mask esa 2050-yilgacha Marsga bir million odamni yuborishni maqsad qilgan. 2020-yilda Mask o‘z kompaniyasining olti yildan keyin birinchilardan bo‘lib Marsga odam yetkazishi mumkinligini aytgandi. “Agar omadimiz kelsa, to‘rt yilda ham bo‘lishi mumkin”, — deb taxmin qilgan u. SpaceX’ning Marsga uchuvchisiz missiyasini ikki yildan keyin amalga oshirish rejalashtirilmoqda.
Shuningdek, Mask Marsni o‘zlashtirish jarayonida ancha-muncha odam qurbon bo‘lishini ham tan olgan.
Izoh (0)