2021-yilning fevral oyida Shvetsiyaga ishlash uchun borib, 20-iyun kuni salomatligi yomonlashishi oqibatida vafot etgan qashqadaryolik I.K.ning jasadi O‘zbekistonga olib kelindi. Bu haqda Tashqi mehnat migratsiyasi agentligi xabar berdi.
Ma’lum qilinishicha, marhumning oila a’zolarining murojaatiga asosan O‘zbekistonning Germaniyadagi elchixonasi bilan birgalikda I.K.ning jasadini vatanga qaytarish yuzasidan tashkiliy-huquqiy ishlar amalga oshirilgan. 3-iyul kuni Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan O‘zbekistonga olib kelingan.
Ma’lumot uchun, 2021-yilning dastlabki 6 oyi davomida xorijda vaqtinchalik mehnat faoliyatini amalga oshirayotgan vaqtda vafot etgan 218 nafar fuqaroning jasadi O‘zbekistonga qaytarilgan.
Avvalroq Rossiyada qurilish maydonida yiqilib halok bo‘lgan 22 yoshli o‘zbekistonlikning jasadi mamlakatga olib kelingani, Rossiyada majburiy mehnatdan qochib, ikki oyog‘idan ajralgan O‘zbekiston fuqarosiga yordam ko‘rsatilgani to‘g‘risida xabar berilgandi.
Izoh (0)