“O‘zbekiston temir yo‘llari” metro qurilishida 899 mln so‘m talon-toroj qilinishida kompaniyaning aloqasi yo‘qligini ma’lum qildi

Toshkent halqa yo‘li yerosti metropolitenida olib borilgan qurilish ishlarida 899 million so‘m talon-toroj qilingan va ushbu holatlar yuzasidan jinoiy ish qo‘zg‘atilgani haqida xabar berilgandi. Bu yuzasidan “O‘zbekiston temir yo‘llari” rasmiy bayonot berdi.

Ma’lum qilinishicha, “O‘zbekiston temir yo‘llari” tomonidan 2019-yilda Toshkent metropoliteni yerusti halqa yo‘lining birinchi bosqichi bo‘lgan 11 kilometrlik “Do‘stlik-2” – “Qo‘yliq” uchastkasida qurilish ishlari boshlangan. Ushbu loyiha qurilishi 2020-yilning mart oyida to‘liq tugatilib, foydalanish uchun topshirilishga tayyor bo‘lgan.

Biroq butun dunyoda keng tarqalgan COVID-19 kasalligining O‘zbekistonga kirib kelishi oqibatida karantin choralari kuchaytirilishi sababli mazkur yo‘nalishning ochilishi noma’lum vaqtga qoldirilgan. Qurilishda ishtirok etgan barcha ishchi-xizmatchilar karantin choralari yumshatilgunga qadar o‘zlarini izolyatsiya qilgan.

2020-yilning 3-iyul kuni “O‘zbekiston temir yo‘llari”ga qarashli “1-sonli Energomontaj poyezdi” unitar korxonasi xodimlari Toshkent metropolitenining yerusti “Do‘stlik-2”—“Qo‘yliq” uchastkasini ko‘rikdan o‘tkazishganda moddiy tovar (kabel mahsulotlari)ning o‘z joyida yo‘qligi aniqlangan va ushbu holat bo‘yicha zudlik bilan Ichki ishlar vazirligi Transportda xavfsizlikni ta’minlash bosh boshqarmasining huquqni muhofaza qiluvchi organ xodimlariga ariza shaklida murojaat qilingan (quyidagi suratda).

Dastlabki tergov natijalariga ko‘ra, umumiy qiymati 899 131 590 so‘mlik kabel mahsulotlari noma’lum shaxslar tomonidan o‘g‘irlangan. Olib borilgan tergov harakati natijalariga ko‘ra, aybdor shaxslar hamda yo‘qolgan moddiy tovar (180 962 364 so‘mlik) topilib, Jinoyat kodeksining tegishli moddalariga binoan jinoyatchilar o‘rnatilgan tartibda javobgarlikka tortilgan. Bugungi kunda yetkazilgan 180 962 364 so‘mlik zarar aybdorlardan to‘liq undirilgan.

Ayni paytda ushbu holat yuzasidan Ichki ishlar vazirligi Transportda xavfsizlikni ta’minlash bosh boshqarmasi tomonidan tergov va qidiruv ishlari davom etmoqda.

Bundan avval UzAuto Motors zavodiga olib kelinayotgan po‘lat listlarning bir qismi talon-toroj qilingani, O‘zbekistondagi ikkita OTM buxgalterlari 22,5 mlrd so‘mni o‘zlashtirgani aniqlangani hamda Buxoroda maktabni ta’mirlashda talon-torojlikka yo‘l qo‘ygan qurilish tashkiloti rahbari javobgarlikka tortilgani haqida xabar berilgandi.