Rossiyada majburiy mehnatdan qochib, ikki oyog‘idan ajralgan O‘zbekiston fuqarosiga yordam ko‘rsatildi

Rossiyada og‘ir ahvolda qolgan O‘zbekiston fuqarolari vatanga qaytariladi, deya xabar qilmoqda Tashqi mehnat migratsiyasi.

Qayd etilishicha, samarqandlik A.N. oilaviy sharoiti og‘irligi sababli 2007-yilda Rossiyaga ishlagani boradi. 2020-yilda A.N. qurilish obyektida majburlab ishlatiladi. Majburiy mehnatdan qochish maqsadida qurilish obyekti atrofidagi o‘rmonzorga yashirinishga majbur bo‘ladi. O‘rmonzorda adashib, bir necha kun sovuqda qolib ketishi oqibatida ikki oyog‘idan ajraladi.

Agentlikning Sankt-Peterburg shahridagi vakolatxonasi, O‘zbekistonning Sankt-Peterburg shahridagi Bosh konsulxonasi hamkorligida fuqaroga birlamchi tibbiy yordam olishi uchun ko‘maklashildi, “Vatanga qaytish guvohnomasi” rasmiylashtirib berildi. Homiylarning moliyaviy ko‘magi bilan 6-iyun kuni Sankt-Peterburg—Samarqand aviareysi orqali O‘zbekistonga qaytarildi.

Shuningdek, Samarqand viloyatidan Sh.N. va M.S. pandemiya sharoitida ish topolmay, pulsiz qiyin ahvolda qolgan.

Ushbu fuqarolar Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan Sankt-Peterburgdan Samarqandga olib kelindi.

Bundan avval Rossiyada murakkab vaziyatda qolgan 7 nafar O‘zbekiston fuqarosiga yordam ko‘rsatilgani, Rossiyaga ketib, 18 yil bedarak yo‘qolgan O‘zbekiston fuqarosi vatanga qaytarilgani hamda Rossiyada baxtsiz hodisaga uchragan o‘zbekistonlik ona va bolaga yordam ko‘rsatilgani haqida xabar berilgandi.