Toshkent viloyati Parkent tumanida joylashgan Chotqol qo‘riqxonasida anomal issiq tufayli yong‘in sodir bo‘ldi, deya xabar bermoqda Davlat ekologiya qo‘mitasi matbuot xizmati.
O‘zbekiston Ekologiya va atrof-muhitni muhofaza qilish davlat qo‘mitasi tarkibidagi Chotqol davlat biosfera qo‘riqxonasining dengiz sathidan 1500–1700 metr balandlikdagi Teraklisoy hududida anomal ob-havo ta’sirida yong‘in chiqqan. Bu haqda shu atrofda xizmat o‘tayotgan qo‘riqxona inspektorlari 2021-yil 5-iyul kuni o‘zlaridagi mavjud aloqa vositalari orqali xabar bergan.
Yong‘in hududi kengayib ketishining oldini olish va uni butunlay o‘chirish, qolaversa, yurish va harakatlanish qiyin bo‘lgan tog‘ning yuqori qismida o‘t chiqishining sabablarini aniqlash maqsadida shu kunning o‘zida Favqulodda vaziyatlar vazirligi, Mudofaa vazirligi, Milliy gvardiya va Davlat ekologiya qo‘mitasi tomonidan qo‘shma tadbir o‘tkazildi.
Qariyb bir gektarni egallagan yong‘inda asosan qurigan o‘t-o‘lanlar yongan, ko‘p yillik daraxtlarga zarar yetishining oldi olingan. 2021- yilning 6-iyul holatiga yong‘in to‘liq o‘chirilib, qo‘shma tadbirda qatnashganlar orasida jarohatlanish qayd etilmadi.
Bundan avval Samarqandda Zarafshon milliy tabiat bog‘ining 1,5 gektar maydoni yonib ketgani, Chinozda g‘alladan bo‘shagan yer maydon yoqib yuborildi. Aybdorga nisbatan 1,2 mln so‘m jarima solingani hamda O‘rta Chirchiqdagi korxonalarning birida yong‘in chiqqani haqida xabar berilgandi.
Izoh (0)