Toshkentda 1-avgustdan 9 ta avtobus yo‘nalishiga o‘zgartirish kiritiladi, 2 ta yangi yo‘nalish tashkil etiladi

Toshkent shahrida bir qator avtobuslar yo‘nalishi o‘zgartirilib, yangilari tashkil etiladi, deya xabar bermoqda shahar transport boshqarmasi.

O‘zbekiston Vazirlar Mahkamasining 2020-yil 16-martdagi “Toshkent shahar yo‘lovchi transporti tizimini takomillashtirish chora-tadbirlari to‘g‘risida”gi 157-sonli qaroriga muvofiq, Toshkent shahridagi mavjud avtobus yo‘nalishlari tarmog‘i qayta ko‘rib chiqilishi belgilangan.

Avtobus yo‘nalishlari harakatini muvofiqlashtirishning navbatdagi bosqichida 2021-yilning 1-avgust kunidan boshlab 9 ta (50, 56, 63, 82, 86, 100, 103, 105, 124-sonli) yo‘nalish harakatiga o‘zgartirishlar kiritish va 2 ta yangi (7, 181-sonli) yo‘nalishlarni ochish rejalashtirilmoqda.

Yo‘nalishlar harakatiga kiritilayotgan o‘zgartirishlar quyidagi chizmalarda keltirilgan:

Bundan avval Bishkekka O‘zbekistonda ishlab chiqarilgan Isuzu avtobuslarining 50 tasi yetkazib berilgani, BMT Taraqqiyot dasturi va Global ekologiya jamg‘armasi Toshkentda elektrobuslar sotib olishga 3,9 mln dollar ajratishi hamda Toshkentda yakshanba kunlari qator yo‘nalishlardagi Mercedes’lar o‘rnida Isuzu’lar qatnashi haqida xabar berilgandi.