Jons Hopkins universiteti ma’lumotlariga qaraganda, dunyoda koronavirusga chalinganlar soni 178 491 809 kishini tashkil qilmoqda, shularning 3 866 201 nafari vafot etgan. Kasallanish holatlari soni bo‘yicha AQSh (33,5 million), Hindiston (29,9 million), Braziliya (17,9 million), Fransiya (5,8 million) va Turkiya (5,3 million) yetakchilik qilmoqda.
Britaniyalik olimlar COVID-19’ni tezroq davolash usulini topdi
Astmaga qarshi ingalyatordan foydalanish COVID-19’dan tuzalish vaqtini qisqartirishi mumkin. Bu haqda Buyuk Britaniya sog‘liqni saqlash vazirining parlamentdagi o‘rinbosari Jo Cherchill ma’lum qildi.Uning so‘zlariga ko‘ra, hukumat tomonidan olib borilgan tadqiqotlardan birining ko‘rsatishicha, “budesonidni yutish sog‘ayish vaqtini o‘rtacha uch kunga qisqartiradi”. Cherchillning qo‘shimcha qilishicha, ushbu xulosalar faqat oraliq natijalarga asoslangan bo‘lib, ayni paytda bunday davolashning butun foydasini tushunish uchun to‘liq tahlil olib borilmoqda.
Ta’kidlanishicha, avvalroq britaniyalik olimlar ba’zi tish pastalari va og‘iz chaygichlar og‘iz bo‘shlig‘idagi koronavirusni 99,9 foizga yo‘q qila olishini aniqlagan edi. Bunda gap tarkibida rux va qalay bo‘lgan pastalar hamda setilperidiniy xloridini o‘z ichiga oluvchi chaygichlar haqida bormoqda — ushbu mikrobga qarshi elementni tomoq uchun pastilkalarda ham uchratish mumkin.
Xitoyda bir milliarddan ortiq vaksina qo‘llanildi
Xitoyda koronavirusga qarshi qo‘llanilgan vaksinalarning soni bir milliarddan oshib ketdi — dunyo bo‘yicha COVID-vaksinalarning uchdan bir qismi bilan aynan xitoyliklar emlangan.Xitoy hukumati iyul oyigacha aholining 40 foizini to‘liq emlashni rejalashtirmoqda. Sog‘liqni saqlash milliy komissiyasi 2021-yil oxirigacha 70 foiz aholini to‘liq immunizatsiya qilish maqsadini o‘z oldiga qo‘ygan.
Ta’kidlanishicha, Xitoyda Delta shtammi tarqalishi avj olib ketganidan keyin emlash sur’atlari sezilarli darajada oshdi. Bungacha xitoyliklarning aksariyati kasallanish darajasi pasaygani tufayli emlanish shart emas, deb hisoblayotgan edi.
Aholiga mamlakatda ishlab chiqarilgan vaksinalar, shu jumladan, Sinopharm va Sinovac taklif qilinmoqda. Odamlarni emlanishga jalb qilish uchun vaksina olganlarga bepul tuxum tarqatilmoqda, turli xaridlar uchun vaucherlar berilmoqda.
Mavzuga doir: Xitoyning Guanchjou shahrida koronavirus avj olishi tufayli qat’iy cheklovlar kiritildi
Fransiyada komendantlik soati bekor qilindi
Fransiyada 2020-yil oktabrdan buyon amal qilib kelgan komendantlik soati bekor qilindi.Dastlab Fransiya aholisiga 18:00 dan keyin uydan chiqish taqiqlangan edi, so‘nggi oylarda esa bu vaqt 23:00 etib belgilandi.
Oxirgi bir oy ichida mamlakatda koronavirus bilan kasallanish darajasi sezilarli ravishda pasaydi. So‘nggi bir haftada yangi kasallanish holatlari ko‘rsatkichi har 100 ming aholiga taxminan 40 ta holatgacha tushdi.
Polshada uysiz odamlarni koronavirusga qarshi emlash boshlandi
Polshada mamlakatning doimiy yashash joyiga ega bo‘lmagan fuqarolari emlanishi mumkin bo‘lgan birinchi COVID-vaksinatsiya markazlari ochildi.Bunday aksiya boshlangan ilk shaharlardan biri Lodz bo‘ldi. Shuningdek, bu yerda tibbiy sug‘urtasi bo‘lmagan uysizlarni emlash uchun ko‘chma vaksinatsiya punkti ham ish boshladi.
Ularni emlash uchun Amerikaning Johnson & Johnson kompaniyasi vaksinasi — Janssen qo‘llanilmoqda. Shu bilan birga, emlanish ixtiyoriydir. Ammo vaksina olishni istaganlar shaxsini tasdiqlovchi hujjatni taqdim etishi shart emas.
Mavzuga doir: Polshada umummilliy karantin joriy qilindi
Izoh (0)