Koronavirus mutatsiyalari uning asosiy simptomlari o‘zgarishiga olib keldi, deb yozadi “Kommersant” Angliyadagi eng qadimiy universitetlardan biri — London Qirollik kolleji olimlarining xulosasiga tayanib.

Foto: Global Look Press

Olimlarning fikricha, eng ko‘p uchraydigan simptomlar — bosh og‘rig‘i, tumov va tomoq og‘rig‘i.

Ayni vaqtda Jahon sog‘liqni saqlash tashkiloti hozircha isitma, quruq yo‘tal va holsizlikni COVID-19’ning bosh simptomlari deb hisoblamoqda. Bosh og‘rig‘i, burun bitishi va tomoq og‘rig‘i kamroq tarqalgan belgilar hisoblanadi. Buyuk Britaniya Sog‘liqni saqlash milliy xizmati fikricha, isitma, uzoq davom etuvchi yo‘tal hamda hid va ta’m bilish qobiliyatining yo‘qolishi koronavirusning asosiy alomatlaridir.

Olimlar ma’lum qilishicha, pandemiya boshida kuchli yo‘tal kasallanganlarning 46 foizida kuzatilgan. Ammo endi boshqa belgilar birinchi o‘ringa o‘tgan. Genetik epidemiologiya professori Tim Spektorning fikricha, shamollash belgilari bo‘lgan bemorlar testdan o‘tishi muhimdir. Uning so‘zlariga ko‘ra, koronavirusning “hindcha” variant yoshlarda oddiy shamollash kabi kechadi, biroq ular boshqalarga bu virusni yuqtirishi mumkin.