Жонс Ҳопкинс университети маълумотларига қараганда, дунёда коронавирусга чалинганлар сони 178 491 809 кишини ташкил қилмоқда, шуларнинг 3 866 201 нафари вафот этган. Касалланиш ҳолатлари сони бўйича АҚШ (33,5 миллион), Ҳиндистон (29,9 миллион), Бразилия (17,9 миллион), Франция (5,8 миллион) ва Туркия (5,3 миллион) етакчилик қилмоқда.
Британиялик олимлар COVID-19’ни тезроқ даволаш усулини топди
Астмага қарши ингалятордан фойдаланиш COVID-19’дан тузалиш вақтини қисқартириши мумкин. Бу ҳақда Буюк Британия соғлиқни сақлаш вазирининг парламентдаги ўринбосари Жо Черчилль маълум қилди.Унинг сўзларига кўра, ҳукумат томонидан олиб борилган тадқиқотлардан бирининг кўрсатишича, «будесонидни ютиш соғайиш вақтини ўртача уч кунга қисқартиради». Черчиллнинг қўшимча қилишича, ушбу хулосалар фақат оралиқ натижаларга асосланган бўлиб, айни пайтда бундай даволашнинг бутун фойдасини тушуниш учун тўлиқ таҳлил олиб борилмоқда.
Таъкидланишича, аввалроқ британиялик олимлар баъзи тиш пасталари ва оғиз чайгичлар оғиз бўшлиғидаги коронавирусни 99,9 фоизга йўқ қила олишини аниқлаган эди. Бунда гап таркибида рух ва қалай бўлган пасталар ҳамда сетилперидиний хлоридини ўз ичига олувчи чайгичлар ҳақида бормоқда — ушбу микробга қарши элементни томоқ учун пастилкаларда ҳам учратиш мумкин.
Хитойда бир миллиарддан ортиқ вакцина қўлланилди
Хитойда коронавирусга қарши қўлланилган вакциналарнинг сони бир миллиарддан ошиб кетди — дунё бўйича COVID-вакциналарнинг учдан бир қисми билан айнан хитойликлар эмланган.Хитой ҳукумати июль ойигача аҳолининг 40 фоизини тўлиқ эмлашни режалаштирмоқда. Соғлиқни сақлаш миллий комиссияси 2021 йил охиригача 70 фоиз аҳолини тўлиқ иммунизация қилиш мақсадини ўз олдига қўйган.
Таъкидланишича, Хитойда Дельта штамми тарқалиши авж олиб кетганидан кейин эмлаш суръатлари сезиларли даражада ошди. Бунгача хитойликларнинг аксарияти касалланиш даражаси пасайгани туфайли эмланиш шарт эмас, деб ҳисоблаётган эди.
Аҳолига мамлакатда ишлаб чиқарилган вакциналар, шу жумладан, Sinopharm ва Sinovac таклиф қилинмоқда. Одамларни эмланишга жалб қилиш учун вакцина олганларга бепул тухум тарқатилмоқда, турли харидлар учун ваучерлар берилмоқда.
Францияда комендантлик соати бекор қилинди
Францияда 2020 йил октябрдан буён амал қилиб келган комендантлик соати бекор қилинди.Дастлаб Франция аҳолисига 18:00 дан кейин уйдан чиқиш тақиқланган эди, сўнгги ойларда эса бу вақт 23:00 этиб белгиланди.
Охирги бир ой ичида мамлакатда коронавирус билан касалланиш даражаси сезиларли равишда пасайди. Сўнгги бир ҳафтада янги касалланиш ҳолатлари кўрсаткичи ҳар 100 минг аҳолига тахминан 40 та ҳолатгача тушди.
Мавзуга доир: Ҳиндистонда Тожмаҳал очилди, Францияда ниқоб режими юмшатилди, Украинада карантин ёз охиригача узайтирилди. Коронахабарлар
Польшада уйсиз одамларни коронавирусга қарши эмлаш бошланди
Польшада мамлакатнинг доимий яшаш жойига эга бўлмаган фуқаролари эмланиши мумкин бўлган биринчи COVID-вакцинация марказлари очилди.Бундай акция бошланган илк шаҳарлардан бири Лодз бўлди. Шунингдек, бу ерда тиббий суғуртаси бўлмаган уйсизларни эмлаш учун кўчма вакцинация пункти ҳам иш бошлади.
Уларни эмлаш учун Американинг Johnson & Johnson компанияси вакцинаси — Janssen қўлланилмоқда. Шу билан бирга, эмланиш ихтиёрийдир. Аммо вакцина олишни истаганлар шахсини тасдиқловчи ҳужжатни тақдим этиши шарт эмас.
Мавзуга доир: Польшада умуммиллий карантин жорий қилинди
Изоҳ (0)