1,5 mln dollarlik mukofot, bepul pitssa va tovuq. Jahonda COVID-19’ga qarshi emlanganlar qanday rag‘batlantirilmoqda?

Koronavirusga qarshi vaksinalarning xilma-xilligiga qaramay, dunyo bo‘ylab odamlarni emlash darajasi hali jamoaviy immunitetni shakllantirishga imkon bermayapti. Mamlakatlar o‘z fuqarolarini nafaqat taqiqlar bilan, balki rag‘batlar bilan ham vaksinatsiyaga undamoqda. Turli mamlakatlarda COVID-19’ga qarshi emlanganlar qanday bonuslarni qo‘lga kiritayotgani haqida “RBK” fotoreportaj tayyorladi.

May oyida Serbiya prezidenti Aleksandar Vuchich oy oxiriga qadar COVID-19’ga qarshi vakisnaning to‘liq yoki hech bo‘lmaganda birinchi komponenti bilan emlanadigan har bir kishiga 3000 dinor (taxminan 25 yevro yoki 30 dollar) va’da qildi. Kraguyevaz shahrida “Milyutin yaqinidagi kutubxona” restorani o‘z zallaridan birida emlash punkti tashkil qilish bilan birga  emlangan barcha mehmonlarni sixda pishirilgan buqa go‘shti bilan bepul mehmon qildi.

Kaliforniyada rasmiylar Vax for the Win lotereyasini boshladi. Unda vaksina olgan kaliforniyaliklarning barchasi ishtirok etishi mumkin, ammo avval ularning emlangani to‘g‘risidagi ma’lumotlar davlat ro‘yxatiga kiritilgan bo‘lishi kerak. Sovrinlar orasida “juma kunlari uchun 50 ming dollar”, 1,5 million dollarlik gran-pri, shuningdek, ovqatlanish va ko‘ngilochar tadbirlar uchun yo‘llanmalar mavjud. Hukumat ma’lumotlariga ko‘ra, 15 nafar g‘olib allaqachon 50 ming dollardan yutib olgan, yana o‘n kishi 1,5 million dollardan qo‘lga kiritgan. Ishtirokchilarga yangi sovg‘alar va’da qilinmoqda, 1-iyul kuni ularga yashash, ovqatlanish va dam olish xarajatlari to‘langan oltita to‘rt kishilik “orzu vaucheri” taqdim etiladi.

Rossiyada koronavirusga qarshi emlanganlar uchun kvartiralar, avtoulovlar va jihozlar yutug‘i qo‘yilgan yoki pul to‘lanadi. Moskvada 14-iyundan 11-iyulgacha vaksinaning birinchi komponenti bilan emlanganlarning barchasi Renault Logan rusumli avtomashinani yutib olishi mumkin, 1-iyulgacha emlanishni boshlagan qariyalar 1000 rubllik chegirma kuponlariga ega bo‘ladi.

Yamal shahrida emlanganlar orasida Apple smartfonlari, velosipedlar, quloqchinlar, Smart-soatlar, Ufa va Podmoskvyeda esa kvartiralar o‘ynalmoqda, Tolyattida vaksina olgan aholi lotereya orqali 75 ming rubl yutishi mumkin. Ammo bonuslarga va emlashni ixtiyoriy ravishda davom ettirish va’dalariga qaramay, yettita hududda ayrim toifadagi fuqarolarga emlanish majburiy etib belgilandi.

AQSh hukumati hamkorlik uchun asosan qora tanlilar tashrif buyuradigan sartaroshxonalarni jalb qilishga qaror qildi va to‘g‘ridan to‘g‘ri salonlarda vaksinatsiya o‘tkazishni so‘radi. Masalan, Chikagoda salonlarga vaksina uchun tashrif buyuruvchilar nafaqat sochlarini tekin oldiradi, balki Kaliforniyadagi Great America ko‘ngilochar bog‘iga ikkita chiptani qo‘lga kiritadi. Merilendda sartaroshxonada emlanganlar bepul sendvich bilan mehmon qilinadi, shuningdek, The Shop Spa salonida soch va soqolini oldirish uchun 30 dollarlik vaucherlarga ega bo‘ladi.