Hindistonda koronavirusning yangi mutatsiyasi aniqlandi

Hindistonda koronavirus “hindcha” shtammining yangi varianti tarqaldi. Maxarashtra shtatida aniqlangan ushbu tur “Delta-plus” deb nomlandi (“hindcha” shtamm “delta” deb atalgan). Bu haqda Hindustan Times xabar berdi.

Xabarga ko‘ra, umumiy hisobda shtatning to‘rtta tumanida yangi mutatsiyani yuqtirish bo‘yicha 20 ta holat qayd etildi.

Hindiston Sog‘liqni saqlash vazirligining ta’kidlashicha, yangi shtamm tadqiqotchilarda qiziqish uyg‘otmoqda va hanuzgacha xavotirli mutatsiyalar toifasiga kiritilmagan.

Biroq NDTV telekanali Hindiston Tibbiyot fanlari instituti rahbari Randip Guleriyaning so‘zlariga asoslanib, ushbu shtamm o‘rganilmasa kelajakda tashvish tug‘dirishi mumkinligi haqida ogohlantirdi. Guleriyaning aniqlik kiritishicha, yangi mutatsiya “yuqumlilik jihatdan” virusning xususiyatlarini o‘zgartirib yuborishi mumkin, uning xatti-harakatini bir necha hafta davomida kuzatib borish lozim.

Eslatib o‘tamiz, 2020-yilning oktabr oyida Hindistonda koronavirusning delta varianti aniqlangandi. O‘shandan beri ushbu shtamm mamlakat chegaralaridan ancha uzoqqa tarqaldi va ko‘plab mamlakatlarda, shu jumladan, Yevropa va Osiyoda qayd etildi.

Avvalroq Jahon sog‘liqni saqlash tashkiloti koronavirusning delta varianti butun dunyoda ustunlikka erishayotgani haqida ogohlantirgandi. Ta’kidlanishicha, ushbu tur dunyoning 80 dan ortiq davlatida aniqlanib, tarqalib borgani sari ko‘proq mutatsiyaga uchramoqda.

JSST ma’lumotlariga ko‘ra, koronavirusning delta varianti alfa-shtamm( koronavirusning “britancha” shtammi)dan 60 foizga faolroq bo‘lib chiqqan. U, shuningdek, og‘irroq simptomlar chaqiradi, ammo bu xulosalar tasdiqlanishi uchun qo‘shimcha tadqiqotlar o‘tkazilishi kerak.