Jons Hopkins universiteti ma’lumotlariga qaraganda, dunyoda koronavirusga chalinganlar soni 176 967 559 kishini tashkil qilmoqda. Virus oqibatida vafot etganlar soni 3 830 585 kishiga yetdi. Kasallanish holatlarining ko‘pligi bo‘yicha AQSh (33,4 million), Hindiston (29,6 million), Braziliya (17,6 million), Fransiya (5,8 million) va Turkiya (5,3 million) yetakchilik qilmoqda.

Parijdagi jazirama

Foto: EPA

Hindistonda ikki oylik tanaffusdan keyin Tojmahal ochildi

16-iyun kuni Hindistonda Tojmahal maqbarasi tashrifchilar uchun ochildi. Me’moriy majmua mamlakatda koronavirus avj olgani tufayli ikki oy davomida yopiq bo‘lgandi. Majmua hududiga bir vaqtning o‘zida ko‘pi bilan 650 kishi kiritiladi.

“Barcha tashrifchilar niqob taqishi kerak, mehmonlar maxsus jamoalar tomonidan kuzatib boriladi”, — dedi Agra shahri bo‘yicha Hindiston Me’moriy boshqarmasi boshlig‘i Vasant Kumar Savarnkar.

Uning so‘zlariga ko‘ra, chiptalarni faqat onlayn tarzda sotib olish mumkin bo‘ladi. Tojmahalning marmar devorlariga qo‘l tekkizish qat’iyan taqiqlanadi. Tashrifchilar dezinfeksiyalovchi vosita shimdirilgan gubkali qoplamaga ega maxsus yo‘laklardangina yurishi mumkin.

Ilgarilari Tojmahalga bir kunda o‘rtacha 40 ming kishi tashrif buyurgan.

Fransiyada niqob rejimi yumshatilib, komendantlik soati bekor qilindi

Fransiyada 17-iyundan ko‘chada niqob taqish majburiyati bekor qilindi. Bu haqda bosh vazir Jan Kasteks ma’lum qildi.

Bundan tashqari, 20-iyundan boshlab 23:00 dan 06:00 gacha amal qilib kelayotgan komendantlik soati bekor bo‘ladi. Aslida reja bo‘yicha bu chora 30-iyungacha amal qilishi kerak edi.

Odamlar ko‘p to‘planadigan joylarda, navbatlarda va yopiq binolarda niqob taqish majburiyati saqlanib qoladi.

Ukrainada karantin 31-avgustgacha uzaytirildi

Ukraina Vazirlar Mahkamasi 16-iyun kuni mamlakatdagi karantinni 31-avgustgacha uzaytirib, yangi karantin cheklovlarini joriy qildi.

Butun mamlakat hududida epidemik xavfning “yashil” darajasi o‘rnatilmoqda, bunda jamoat transportida va ommaviy tadbirlar chog‘ida niqob rejimi saqlanib qoladi.

Umumiy ovqatlanish va ko‘ngilochar muassasalar (tungi klublar), kinoteatrlar va madaniyat sohasidagi boshqa zallar hamda niqob rejimiga rioya qilgan holda boshqa ommaviy tadbirlar o‘tkazilishiga ruxsat beriladi.

Belarus o‘zining koronavirusga qarshi vaksinasini sinashni boshlaydi

Belarusda Epidemiologiya va mikrobiologiya Respublika ilmiy-amaliy markazida mamlakatda ishlab chiqilgan COVID-19’ga qarshi vaksina sinovlari boshlanadi.

Tajribaviy namuna ustidagi ishlar kuzgacha yakunlanishi va 2022-yilda vaksinani yalpi ishlab chiqarish boshlanishi rejalashtirilgan.