O‘zbekistonda 2021-yilda 52 mingdan ortiq ekilgan daraxtlar qurib qolgan. Bu haqda Xalq deputatlari Mirzo Ulug‘bek tuman kengashi deputati Jahongir Ziyoyev ma’lum qildi.
“Orol dengizining qurigan sho‘r yerida daraxtlar ko‘karayotgan bir paytda Toshkentda daraxtlarni saqlab qolish qiyin bo‘lyapti, deyish cho‘pchakdan boshqa narsa emas.
Xo‘sh, joy tanlashda xatolikka yo‘l qo‘yilgan ham deylik. Lekin 52 mingta daraxtning uvoli, unga ketgan xarajat, mehnat uchun kim javob beradi?
Xo‘sh, endi nima qilish kerak? Har yili shu cho‘pchakka ishonib o‘tiraveramizmi?” — deya savol qo‘ygan “Milliy tiklanish” partiyasi vakili.
Jahongir Ziyoyev buning yechimi sifatida daraxtni kesganlarga jarima solingani kabi, daraxt ekib, parvarish qilmaganlarni ham jarimaga tortishni ilgari surdi.“Davlatning puliga ‘biz shuncha ming daraxt ekdik’ deb hisobot beradigan hokimiyat, obodonlashtirish boshqarmalari, tashkilotlar ekkan niholi ko‘karmasa, cho‘ntagidan jarima to‘lasin. Shundagina ‘joyni noto‘g‘ri tanlab qo‘yibmiz, sug‘orish tizimiga ulanmagan ekan’, degan bahonalar bo‘lmaydi. Jarima to‘lasa, joy ham to‘g‘ri tanlanadi, suv ham keladi”, — deya ta’kidlaydi u.
“Milliy tiklanish” partiyasi a’zosi fuqarolarni ham bunga e’tiborsiz bo‘lmaslikka chaqirdi.
“Odamlar ham yon-atrofi, mahallasida ekilgan nihollarga e’tiborli bo‘lib, parvarishlab tursa ham qanchadan-qancha daraxtlarni saqlab qolgan bo‘lamiz. Ya’ni, bu ‘davlatniki-ku, menga nima’ degan qarashdan voz kechish lozim. Kerak bo‘lsa, daraxtparvar insonlarni rag‘batlantirish kerak”, — deb qo‘shimcha qilgan deputat.
Bundan avval O‘zbekistonda to‘rt oy davomida 2000 dan ziyod noqonuniy daraxt kesish holatlari aniqlangani, Sergeli—Qo‘yliq yerusti metrosi qurilishida uch tumanda jami 785 ta daraxt boshqa joyga ko‘chirilishi hamda Surxondaryo hokimligi Butunjahon bioxilma-xillikni asrash kuni archalar ommaviy kesilganiga munosabat bildirgani haqida xabar berilgandi.
Izoh (0)