“30 yillik tariximizda har hasharda e’lon qilingan ko‘chatlar amalda ekilganida edi, O‘zbekiston o‘rmonzorga aylanib ketardi” — bloger rasmiylarni tabiat o‘zgarishlariga jiddiy qarashga chaqirdi
Nazarimizda, hukumat tabiat o‘zgarishlari ortidan yuzaga kelayotgan muammolarga jiddiy qarashni boshlashi lozim. Ayniqsa, ekologiya bo‘yicha reja hamda dasturlarini qayta ko‘rib chiqishi kerak, deb yozmoqda Telegram’dagi “Davletovuz” kanali yurituvchisi, bloger Qobil Xidirov.
Uning so‘zlariga ko‘ra, bir martalik tadbirlardan, kampaniyabozlikdan tiyilgan holda keng jamoatchilik ishtirokida natijasi aniq, barqarorligi kafolatlangan, iqtisodiy asosli va muvofiqlashtirilgan sa’y-harakatlarga qo‘l urish vaqti keldi.
“Oddiy misol. Har yili hasharlarda millionlab daraxt ekishlarni to‘xtatish kerak. ‘Toshkentning har bir tumanida 1 million dona ko‘chat ekamiz’, degan yolg‘on kampaniyalarga ham barham berilishi lozim. Chunki o‘ttiz yillik tariximizda har hashar yakunida e’lon qilingan ko‘chatlar amalda ekilganida yoki o‘sganida, O‘zbekiston allaqachon o‘rmonzorga aylanib ketgan bo‘lar edi. Ko‘chatlar va ko‘kalamzorlashtirish milliardlab mablag‘lar oson o‘zlashtiriladigan sohaga aylangani qoldi, xolos. Har bir daraxt ko‘chati o‘tqazilishidan tortib, o‘sishi, parvarishi, sug‘orilishi kafolatlagan, javobgarligi aniq bo‘lgan tizim yaratilmas ekan, yaxshisi, daraxt ekilmagani ma’qul. O‘zimizni ham, boshqalarni ham aldamay qo‘ya qolaylik”, — deydi bloger.
Mavzuga doir: Kesilgan daraxt o‘rniga 10 ta ko‘chat: Bahorda Toshkent shahrida 409 mingta daraxt ekiladi
“Shuning uchun hozirdan nafaqat aholi punktlariga ichimlik suvi trubalarini tortish, balki suv zaxiralarini yaratish, qayta ishlash, muqobil texnologiyalarni joriy etish, qishloq xo‘jaligi yerlarini muttasil optimallashtirib borish, agrar sohada suvdan foydalanishning tejamkor texnologiyalarini amalda qo‘llash, hozirdan ushbu masalalarga investitsiyalarni ko‘paytirish, va eng muhimi, bu ishlarning ustidan jamoatchilik nazoratini o‘rnatish zarur. Hayot-mamot masalasini pul o‘zlashtirish jarayoniga aylantirib yuborishdan yomoni yo‘q. Chunki kelajakda paxtalarimiz tugul xalqimizni ichimlik suvi bilan ta’minlash og‘ir vazifa bo‘lib qolishi mumkin”, — deb yozmoqda “Davletovuz” kanali muallifi.
Bloger tabiat o‘zgarishlariga siyosatchilar jiddiy qarashlari lozimligini, tabiat o‘zgarishlari asta-sekin ijtimoiy-siyosiy muammolarni keltirib chiqarishini ta’kidladi.
“Uzoq tarixda ham, yaqin tarixda ham bunga misollar yetarlicha. Yangi O‘zbekiston yangi ekologik realliklarni ham tan olishi lozim. Ancha kechikdik, lekin yana kechikishning oqibatlari og‘irroq bo‘lishi mumkin. Hozirdan kirishishimiz, kirishganda ham, kampaniyabozlikdan tiyilishimiz, darrov milliard-milliard dollarlik gigant loyihalarga emas, balki ilmga, dunyo tajribasiga asoslanib, bosiqlik bilan ishlashga o‘tishimiz kerak. IMHO, albatta”, — deya o‘z munosabatini odatdagidek yakunlagan u.
Eslatib o‘tamiz, 2021-yilning boshlarida O‘zbekistonda noqonuniy kesilgan har tup daraxt uchun 100 tup ko‘chat ekishni majburiy etish taklif qilingandi. Toshkent shahar hokimi Jahongir Ortiqxo‘jayev poytaxtda 30 milliard so‘mga daraxt ekishni taklif qilgandi.
