Toshkent viloyati Olmaliq shahrida joylashgan Ammofos-Maxam aksiyadorlik jamiyatida ko‘p yillardan buyon ishlab kelgan ayollar sababsiz ishdan bo‘shatilayotgani haqida xabar berilgandi. Holat bo‘yicha Toshkent viloyati Davlat mehnat inspeksiyasi tomonidan o‘rganish o‘tkazildi.
O‘rganishda jamiyat ishchi xodimlari uchun oziq-ovqat mahsulotlari Kasanachilikni tashkil qilish xizmati xodimlari tomonidan yetishtirilishi ma’lum bo‘ldi. Oziq-ovqat mahsulotlarini tayyorlash sifatini yaxshilash, ishlab chiqarish bilan bog‘liq xarajatlarni optimallashtirish maqsadida jamiyat xodimlarining ovqatlanishini tashkil etish 2021-yil 1-martdan autsorsing shartlari asosida ixtisoslashtirilgan kompaniyaga topshirilgan.
Natijada Kasanachilikni tashkil qilish xizmati xodimlari bilan mehnat shartnomasini Mehnat kodeksining 100-moddasi ikkinchi qismi 1-bandi (mehnat shartnomasini ish beruvchining tashabbusi bilan bekor qilish) bilan bekor qilish bo‘yicha ogohlantirish xatlari berilgan.
Holat bo‘yicha jamiyat rahbariyatiga amaldagi qonunchilik normalariga rioya etish yuzasidan zarur tavsiyalar berilgan.
Eslatib o‘tamiz, Ammofos-Maxam AJ bilan jami 99 nafar xodim kasanachi sifatida shartnoma tuzib, ishlab kelgan. Ular korxonaga qarashli bo‘lgan oshxona uchun qishloq xo‘jaligi mahsulotlarini yetishtirib bergan. 2021-yil 1-martdan oshxonalar autsorsing shartlari asosida mazkur faoliyat bilan shug‘ullanuvchi kompaniyaga berilgan. G‘olib kompaniya esa zarur bo‘lgan mahsulotlarni uzoq muddatli shartnomalar asosida o‘z yetkazib beruvchilaridan sotib olishni afzal ko‘rgan.
Natijada jami 99 ta kasanachi ish o‘rnini qisqartirishga to‘g‘ri kelgan. Ulardan 47 nafari Olmaliq shahrida doimiy ro‘yxatdan o‘tgan. Korxonaning xodimlar boshqarmasi boshlig‘i Barno Mirsaidova bergan axborotga ko‘ra, 99 nafar kasanachidan 28 nafari tug‘ruq ta’tilida bo‘lganligi sababli bu qisqartirishga uchramasligi ta’kidlandi. Qolgan 71 nafar kasanachi qisqartirish bo‘yicha mehnat qonunchiligiga asosan, rasmiy ogohlantirilgan bo‘lib, ulardan 12 nafari ogohlantirish xatlariga o‘z roziligi bilan imzo chekkan. Qolgan 59 nafar kasanachi korxona tomonidan qisqartirilish holatiga rozilik bildirmagan.
Bundan avval Olmaliq kon-metallurgiya kombinati (OKMK)ga ishga joylashish masalasi sabab bir guruh ayollar shahardagi yo‘lning qatnov qismini to‘sib qo‘ygandi. Holatni o‘rganib chiqqan Bandlik va mehnat munosabatlari vazirligi rasmiy bayonot bergandi.
Izoh (0)