Hukumat 14-iyun kuni “O‘zbekiston Respublikasida suvda dam olish va plyaj turizmini rivojlantirish chora-tadbirlari to‘g‘risida”gi qarorni qabul qildi, deb xabar bermoqda Adliya vazirligi matbuot xizmati.
Qarorga ko‘ra, Jizzax va Navoiy viloyatlarining turistik salohiyatini rivojlantirish maqsadida Aydar-Arnasoy ko‘llar tizimi hamda To‘dako‘l ko‘lida rekreatsion ko‘llar hududi tashkil etiladi. Shunga ko‘ra, mazkur rekreatsion ko‘llar hududida 2021—2025-yillarda turizmni rivojlantirish konsepsiyasi tasdiqlandi.
Rekreatsion ko‘llar hududiga kiruvchi yer uchastkalarini tadbirkorlarga berish, ularda qurilish va barpo etish loyihalarini amalga oshirish Turizm va sport vazirligi bilan majburiy tartibda kelishiladi.
Rekreatsion ko‘llar hududiga kirish nuqtasida axborot markazi va zamonaviy avtoturargoh tashkil etiladi.
Shuningdek, tashrif buyuruvchilarning xavfsizligini ta’minlash maqsadida rekreatsion ko‘llar hududida qutqaruv brigadasi faoliyati yo‘lga qo‘yiladi.
Qaror bilan tasdiqlangan konsepsiyani amalga oshirish orqali har biri 5 yillik davrni o‘z ichiga olgan 3 bosqichli quyidagi natijalarga erishiladi:
- birinchi bosqichda jami 204 o‘rinli 6 ta joylashtirish vositasi, shuningdek, hududda ekoturistik obyektlar, ovchilik va suvda dam olish hududlari tashkil etiladi;
- ikkinchi bosqichda Aydarko‘l atrofidagi 33 ming gektar hududda yangi turistik hududlar, joylashtirish vositasi, sog‘lomlashtirish maskanlari, sport tadbirlari o‘tkaziladigan maydonlar barpo etiladi;
- uchinchi bosqichda 300 o‘rinli joylashtirish vositalari va sport tadbirlari o‘tkaziladigan maydonlar tashkil etiladi, 1200 o‘ringa mo‘ljallangan avtoturargoh hamda savdo hududi quriladi.
Eslatib o‘tamiz, “O‘zbekiston Respublikasida suvda dam olish va plyaj turizmini rivojlantirish chora-tadbirlari to‘g‘risida”gi Vazirlar Mahkamasi qarori loyihasi 2021-yilning mart oyida muhokamaga qo‘yilgandi.
O‘zbekistonda ichki turizmni tiklash va rivojlantirish maqsadida Aydar-Arnasoy ko‘llar tizimida va To‘dako‘l tizimida dam olish hududlari tashkil etilishi ko‘zda tutilgani haqida 2020-yilning may oyida ma’lum bo‘lgandi. Prezident Shavkat Mirziyoyevga taqdim etilgan loyihalarda Aydar-Arnasoy ko‘llar tizimida Orom qirg‘og‘i (Leisure Coast) suv sohilbo‘yi dam olish maskani tashkil etish, Aydar-Arnasoy ko‘llar tizimi bo‘ylab yo‘lovchi tashuvchi muntazam avtobus qatnovini yo‘lga qo‘yish ko‘zda tutilgani ko‘rsatilgan.
2020-yilning avgustida Aziz Abduhakimov mamlakatda “Bochka” nomli sayyohlik maskaniga o‘xshash joylarning ko‘paytirilishini ma’lum qilgandi.