Xorazm viloyati Urganch tuman sudida it urushtirgan shaxslar javobgarlikka tortildi, deb xabar beradi “Mehr va oqibat” hayvonlarni himoya qilish jamiyati.
Ma’lum qilinishicha, “Mehr va oqibat” hayvonlarni himoya qilish NNT direktori nomiga Ya.K. ismli fuqarodan Telegram’dagi kanallarning birida itlar urushtirilgani tasvirlangan video tarqalgani bo‘yicha ariza kelib tushgan. Ijtimoiy tarmoqlarda tarqalgan kadrlarda ikkita pitbul zotli it “tashkilotchilarning” diqqat markazida bir-birini g‘ajiyotgani tasvirlangan. Tomoshabinlar orasida voyaga yetmagan bola ham bo‘lgan.
Jamiyat zudlik bilan huquq-tartibot organlariga hayvonlarga nisbatan shafqatsiz munosabatda bo‘lgan shaxslarni javobgarlikka tortish bo‘yicha xat yo‘llagan.
Tez orada itlarning egalari shaxsiga aniqlik kiritilgan. Ma’lum bo‘lishicha, 2021-yil 5-mart kuni Urganch tumanida 40 yoshli F.T. va 29 yoshli B.M. o‘zlariga tegishli bo‘lgan itlarni urushtirib, hayvonlarga nisbatan shafqatsiz munosabatda bo‘lgani aniqlanib, hujjatlashtirilgan.
Fuqarolar sudda sodir qilgan qilmishiga iqrorlik bildirib, haqiqatan ham Maykl hamda Boss laqabli pitbul zotli itlarni o‘zaro urushtirganini va qilmishidan pushaymon ekanligini bildirgan.
Ikkala fuqaro ham Ma’muriy javobgarlik to‘g‘risidagi kodeksning 111-modda 1-qismi bilan aybli deb topilib, ularga nisbatan BHMning bir baravari miqdorida (245 ming so‘m) jarima jazosi tayinlangan.
Avvalroq Buxoroda itni yeyish uchun o‘ldirib, boshini bolalar bog‘chasiga tashlab ketgan shaxsga chora ko‘rilgani to‘g‘risida xabar berilgandi.
Izoh (0)