Хоразм вилояти Урганч туман судида ит уруштирган шахслар жавобгарликка тортилди, деб хабар беради «Меҳр ва оқибат» ҳайвонларни ҳимоя қилиш жамияти.
Маълум қилинишича, «Меҳр ва оқибат» ҳайвонларни ҳимоя қилиш ННТ директори номига Я.К. исмли фуқародан Telegram’даги каналларнинг бирида итлар уруштирилгани тасвирланган видео тарқалгани бўйича ариза келиб тушган. Ижтимоий тармоқларда тарқалган кадрларда иккита питбул зотли ит «ташкилотчиларнинг» диққат марказида бир-бирини ғажиётгани тасвирланган. Томошабинлар орасида вояга етмаган бола ҳам бўлган.
Жамият зудлик билан ҳуқуқ-тартибот органларига ҳайвонларга нисбатан шафқатсиз муносабатда бўлган шахсларни жавобгарликка тортиш бўйича хат йўллаган.
Тез орада итларнинг эгалари шахсига аниқлик киритилган. Маълум бўлишича, 2021 йил 5 март куни Урганч туманида 40 ёшли Ф.Т. ва 29 ёшли Б.М. ўзларига тегишли бўлган итларни уруштириб, ҳайвонларга нисбатан шафқатсиз муносабатда бўлгани аниқланиб, ҳужжатлаштирилган.
Фуқаролар судда содир қилган қилмишига иқрорлик билдириб, ҳақиқатан ҳам Майкл ҳамда Босс лақабли питбул зотли итларни ўзаро уруштирганини ва қилмишидан пушаймон эканлигини билдирган.
Иккала фуқаро ҳам Маъмурий жавобгарлик тўғрисидаги кодекснинг 111-модда 1-қисми билан айбли деб топилиб, уларга нисбатан БҲМнинг бир баравари миқдорида (245 минг сўм) жарима жазоси тайинланган.
Аввалроқ Бухорода итни ейиш учун ўлдириб, бошини болалар боғчасига ташлаб кетган шахсга чора кўрилгани тўғрисида хабар берилганди.
Изоҳ (0)