Ijtimoiy tarmoqlarda “Surxondaryodan qimmat narxlarda Moskvaga olingan chiptalar soxta ekanligi, 100 dan oshiq yo‘lovchi aeroportda sarson bo‘layotganliklari aytilmoqda” sarlavhali videotasvir tarqaldi. Unda bir qancha yo‘lovchilar yuklari bilan aeroportda o‘tirgani aks etgan. Termiz xalqaro aeroporti ma’muriyati mazkur holat batafsil o‘rganib chiqilganini ma’lum qildi.
Aniqlanishicha, videotasvirda keltirilgan holat Termiz xalqaro aeroporti hududida yoki Uzbekistan Airports tarkibidagi O‘zbekistondagi boshqa xalqaro aeroportlar hududida tasvirga olinmagan, balki bu kabi holat yuz berganligi haqida fuqarolardan murojaat ham bo‘lmagan.
“Ma’lumot uchun aytish joizki, Termiz xalqaro aeroporti yo‘lovchilarga yuqori darajada xizmat ko‘rsatish va ular uchun barcha shart-sharoitlarni yaratish, aeroportning tegishli xizmatlari samarali ishlashini ta’minlash, yo‘lovchilar, yuklar, pochta va bagajga xizmat ko‘rsatish jarayonlarini optimallashtirish, aeroport hududida zamonaviy savdo, ovqatlanish obyektlari, yo‘lovchilarga bank va boshqa xizmatlarni ko‘rsatish tarmoqlarini davlat-xususiy sheriklik shartlari asosida faoliyatini amalga oshiradi”, — deyiladi Termiz xalqaro aeroporti xabarida.
Shuningdek, qo‘shimcha qilinishicha, Termiz xalqaro aeroportining o‘ziga mustaqil ravishda aviachiptalar sotish vakolati belgilab berilmagan va bu korxonaning faoliyatiga taalluqli ham emas. Termiz xalqaro aeroportining qat’iy tartibdagi nazorat qismlarida aviachiptalarni soxtalashtirilishi bilan bog‘liq holatlarga yo‘l qo‘yilmaydi.
Aviavokzal binosida muntazam ravishda yo‘lovchilarga aeroport nazoratchi xodimlari tomonidan aviaparvozning tartib-tamoyillari bo‘yicha tushuntirish ishlari olib borilishi, kutish zallarida o‘rnatilgan monitorlarda yo‘lovchilarni ogohlikka chorlovchi videoroliklar namoyish etib kelinishi bildirilgan.
Avvalroq ijtimoiy tarmoqlarda Qarshi aeroportida turgan samolyotda yo‘lovchilar bir yarim soat davomida turib qolgani, ularga havo yetishmay, ikki nafarining tobi qochgani aytilgan video tarqalgandi. Parvoz Rossiyaning Royal Flight aviakompaniyasi tomonidan amalga oshirilgani, yo‘lovchilar bortga chiqarilgandan so‘ng havo haroratining 44 darajadan yuqori bo‘lishi sabab samolyot dvigatellari ishlamay qolgani ma’lum qilingandi. Natijada ushbu parvozni tungi vaqtda amalga oshirish qarori qabul qilinib, yo‘lovchilar bortni tark etgan. Yo‘lovchilarning sog‘lig‘i yomonlashgani haqida xabar kelib tushmagan.
Izoh (0)