Shavkat Mirziyoyevning Tojikistonga qilgan tashrifi chog‘ida ikki mamlakat hukumatlari o‘rtasida O‘zbekiston hududi orqali yuklar tranziti to‘g‘risida bitim imzolangan. Bu haqda Prezident matbuot kotibi Sherzod Asadov 14-iyun, dushanba kuni o‘tkazilgan brifingdan so‘ng jurnalistlarning savollariga javob berish vaqtida ma’lum qildi, deya xabar bermoqda “Daryo” muxbiri.
“Davlatimiz rahbarining Tojikistonga tashrifi doirasida transport va tranzit sohalarida keng hamkorlik qilishga kelishib olindi. Jumladan, ikki mamlakat transport vazirlari tomonidan O‘zbekiston va Tojikiston hukumatlari o‘rtasida O‘zbekiston hududi orqali yuklar tranziti to‘g‘risida bitim imzolandi.
Shuningdek, O‘zbekiston va Tojikiston transport hamda tranzit sohalaridagi hamkorlikni kengaytirish, temiryo‘l, avtomobil va havo transportida tashishlarni ko‘paytirish uchun bundan buyon ham qulay sharoit yaratishga kelishib olindi.
Jumladan, avtomobil transporti qatnovlari kengaytiriladi, avtobuslar qatnovi va temiryo‘l orqali yo‘lovchilarni tashish qayta tiklanadi. Yuk tashishlar uchun preferensiyalar taqdim etish davom ettiriladi”, — dedi Asadov.
Eslatib o‘tamiz, Shavkat Mirziyoyev Tojikiston prezidenti Emomali Rahmonning taklifiga binoan 10-iyun kuni rasmiy tashrif bilan Tojikistonga jo‘nab ketdi. Tashrifning ilk kunida davlat rahbari Dushanbe xalqaro aeroportida tantanali kutib olindi, “Qasri Millat” qarorgohida uyushtirilgan tantanali marosimda qatnashdi. Shu yerning o‘zida ikki davlat rahbarlari avvaliga tor, so‘ng kengaytirilgan tarkibdagi uchrashuvlarda ishtirok etdi.
Bundan tashqari, Samarqand va Xatlon viloyatlarida qurilgan ijtimoiy obyektlarning ochilish marosimi o‘tkazildi. Tadbirlar yakunida O‘zbekiston va Tojikiston o‘rtasida 35 ta hujjat imzolandi.
Dushanbeda O‘zbekiston va Tojikiston san’at ustalari ishtirokida bo‘lib o‘tgan konsert oldidan Emomali Rahmon Shavkat Mirziyoyevni birinchi darajali “Zarrintoj” ordeni bilan mukofotladi.
Izoh (0)