Qozog‘istonning Air Astana aviakompaniyasi 31-maydan yo‘lga qo‘yilishi rejalashtirilgan Olmaota—Minsk aviaqatnovlarining bekor qilinishini me’yoridan kam tijoriy yuk bilan izohladi. Bu haqda aviakompaniya korporativ kommunikatsiyalar bo‘limi ma’lumotlariga tayanib “Interfaks” xabar berdi.
“Air Astana 2021-yilning 31-may kuni ochilishi rejalashtirilgan Olmaota—Minsk yo‘nalishini bekor qildi. Qaror 20-may kuni qabul qilingan va me’yoridan kam bo‘lgan tijoriy yuklar sabab bo‘ldi. Yo‘lovchilarga reyslarning bekor qilingani haqida o‘sha kunning o‘zidayoq xabar berildi”, — deyiladi kompaniya tomonidan taqdim etilgan ma’lumotlarda.
24-may kuni Qozog‘iston Sanoat va infratuzilmaviy rivojlanish vazirligining matbuot kotibi Madiyor Uakpayevning “Interfaks-Kazaxstan” agentligiga ma’lum qilishicha, Qozog‘iston idoralararo komissiya yig‘ilishida Belarus bo‘ylab parvozlar masalasi ko‘tariladi. Yig‘ilishning qachon o‘tkazilishi hozircha ma’lum emas.
23-may kuni Afinadan Vilnyusga uchayotgan Ryanair kompaniyasining yo‘lovchi samolyoti Minsk aeroportiga qo‘nishga majbur bo‘ldi. Samolyot Litva hududiga yaqinlashayotgan edi, lekin uchuvchi yo‘nalishni Belarus poytaxtiga burib yubordi. Kompaniyaning ma’lum qilishicha, Belarus aviadispetcherlari samolyot bortida yuzaga kelishi mumkin bo‘lgan xavf haqida xabar bergani uchun samolyot Minsk aeroportiga qo‘ngan. Lekin bu ma’lumot tasdiqlanmagan. 23-may kuni Ryanair samolyotida Afinadan Vilnyusga uchib kelayotgan belaruslik muxolifat faoli va bloger, Nexta axborot portali asoschisi, hukumat tomonidan terrorchi deb tan olingan Roman Protasevich yonidagi tanishi, Vilnyusdagi Yevropa gumanitar universiteti talabasi, Rossiya fuqarosi Sofiya Sapega bilan birga Minsk aeroportiga qo‘ngach qo‘lga olingan. Litva prezidentining tashqi siyosat bo‘yicha bosh maslahatchisi Asta Skaysgiritening ma’lum qilishicha, yo‘lovchi tashuvchi samolyotni qo‘ndirish uchun Belarus hukumati MiG-29 qiruvchi samolyotidan va Mi-24 harbiy vertolyotidan foydalangan.
Avvalroq Belarus Protasevichni davlatlararo qidiruvga bergan edi. 2020-yilning noyabr oyida Belarus Bosh prokuraturasi uni hibsga olish va Belarusdagi tartibsizliklarda ayblanuvchi sifatida jinoiy javobgarlikka tortish uchun ekstraditsiya qilish iltimosi bilan Polsha Adliya vazirligiga murojaat yo‘llagan.
Eslatib o‘tamiz, Belarusdagi prezidentlik saylovlari 2020-yil 9-avgust kuni o‘tkazilgan. MSK ma’lumotiga ko‘ra, Lukashenko 80,1 foiz ovoz bilan saylovlarda g‘olib deb topilgan. U mamlakatni 26 yildan buyon boshqarib kelmoqda. Saylov kuni Minsk markazida harbiy texnika paydo bo‘lgan. Poytaxt Minskda prezident saylovidan keyin norozilik namoyishi boshlangan. Shundan keyin mamlakatda norozilik namoyishlari va namoyishchilarni qo‘llab-quvvatlash uchun chiqishlar davom etgan. Shu kabi norozilik namoyishlarining birida Lukashenko o‘z qarorgohiga qo‘lida avtomat bilan uchib kelgandi, uni to‘liq qurollangan o‘g‘li — Nikolay qo‘riqlagan.
Izoh (0)