AQSh prezidenti Jo Bayden o‘z ma’muriyatiga Minskda Ryanair samolyotining favqulodda qo‘nishi va Nexta Telegram kanali asoschilaridan biri hibsga olinishida ishtirok etgan odamlarni javobgarlikka tortish choralarini ishlab chiqishni buyurdi. Bu haqda Oq uyga tayanib, “RBK” xabar berdi.
Jo Bayden Belarusdagi Ryanair samolyoti bilan bog‘liq vaziyatini “xalqaro me’yorlarga to‘g‘ridan to‘g‘ri haqorat” deb atadi.
“Men Yevropa Ittifoqi maqsadli iqtisodiy sanksiyalar va boshqa choralarni ko‘rishga chaqirgani haqidagi xabarlarni mamnuniyat bilan qabul qilaman. Jamoamdan Yevropa Ittifoqi, boshqa ittifoqchilar va sheriklar hamda xalqaro tashkilotlar bilan yaqin hamkorlikda aybdorlarni javobgarlikka tortish uchun tegishli choralar ishlab chiqishni so‘radim”, — dedi Bayden.
Bayden Nexta Telegram kanali sobiq muharriri Roman Protasevichning hibsga olinishini “ham siyosiy o‘zgacha fikrlashga, ham matbuot erkinligiga qarshi sharmandali hujum” deb atadi.
“Qo‘shma Shtatlar Protasevichni, shuningdek, Lukashenko rejimi tomonidan adolatsiz ravishda hibsga olinayotgan yuzlab siyosiy mahbuslarni ozod qilishga chaqirayotgan dunyo davlatlariga qo‘shiladi”, — dedi AQSh prezidenti.
“Bir necha oydan beri Belarus xalqi o‘z ovozi tinglanishiga erishish uchun intilib, demokratiya, inson huquqlariga hurmat va asosiy erkinliklar saqlab qolinishini talab qilmoqda. Men bosh huquqlari uchun kurashayotgan belarusliklarning jasorati va qat’iyatini, shu jumladan, Roman Protasevich kabi jurnalistlar, Svetlana Tixanovskaya va uning eri Sergey Tixanovskiy singari muxolifat rahbarlarini e’tirof etaman. AQSh Belarus xalqini kurashda qo‘llab-quvvatlashda davom etadi”, — deb qo‘shimcha qildi Bayden.
Oq uyning boshqa xabariga ko‘ra, AQSh prezidentining milliy xavfsizlik bo‘yicha yordamchisi Jeyk Sallivan ushbu hodisa masalasida Svetlana Tixanovskaya bilan muzokaralar o‘tkazgan. Sallivan Tixanovskayaga AQSh Yevroittifoq bilan hamkorlikda “Lukashenko rejimini javobgarlikka tortishini” aytgan.
23-may kuni kunduzi Afinadan Vilnyusga yo‘l olgan Ryanair aviakompaniyasi samolyoti Minskka shoshilinch qo‘ndi. Uning bortida Nexta Telegram kanalining sobiq bosh muharriri Roman Protasevich bor edi — samolyot qo‘nganidan keyin u qo‘lga olindi, qolgan yo‘lovchilar esa yetti soatdan keyin parvozni davom ettirish uchun qo‘yib yuborildi. Belarus hukumati qayd etishicha, uchuvchilar bortda xavfsizlikka tahdid tufayli Minskka qo‘nish haqida qaror qabul qilgan.
Mavzuga doir:
- Belarus hukumati Ryanair samolyotiga bomba o‘rnatilgani haqidagi xatni o‘qib eshittirdi. Uni portlatish bilan go‘yoki HAMAS harakati tahdid qilgan
- Litva Belarus havo hududidan o‘tadigan reyslarni qabul qilmaydi va jo‘natmaydi. Mamlakat o‘z fuqarolaridan Belarusni tark etishni so‘radi
- Ryanair reysining Minskka majburiy qo‘ndirilishi Yevroittifoq sammitida muhokama qilinadi. Aviakompaniyalar Belarus ustidan uchishdan bosh tortmoqda. Asosiy ma’lumotlar
Izoh (0)