Jons Hopkins universiteti ma’lumotlariga ko‘ra, dunyoda koronavirusni yuqtirib olganlar soni 167 338 103 kishini tashkil qilmoqda. Virus oqibatida vafot etganlar soni esa 3 474 370 taga teng. Kasallanish holatlarining ko‘pligi bo‘yicha AQSh (33,1 million), Hindiston (26,9 million), Braziliya (16,1 million), Fransiya (5,6 million) va Turkiya (5,1 million) yetakchilik qilmoqda.
Malta COVID-19’ga nisbatan jamoaviy immunitetga erishdi
Maltada voyaga yetgan aholining 70 foizi COVID-19’ga qarshi kamida bitta doza bilan emlandi, shu tariqa mamlakat Yevroittifoqda birinchi bo‘lib jamoaviy immunitetga erishdi. Bu haqda Malta sog‘liqni saqlash vaziri Kris Ferne aytib o‘tdi. Vaksinaning ikkita dozasini ham olganlar ulushi esa 40 foizni tashkil etmoqda.“Mamlakatda har besh soniyada bir kishi emlanmoqda. Voyaga yetgan aholining 42 foizi ikkita dozani oldi”, — dedi Ferne va “vaksina — virusga qarshi qurol” deya qo‘shib qo‘ydi.
Uning so‘zlariga ko‘ra, to‘liq emlangan kishilar iyul oyidan boshlab ko‘chada niqob taqishi shart bo‘lmaydi, ammo bino ichida niqob taqish barcha odamlar uchun majburiy bo‘lib qoladi.
Pandemiya boshidan buyon Maltada 30,5 ming kishi kasallanib, 417 kishi vafot etgan. Ayni paytda mamlakatda 16 yoshdan oshgan fuqarolar 474,4 mingta vaksina olgan.
Mavzuga doir: Isroil koronavirus ustidan g‘alaba qozongani haqida e’lon qildi. Yana qaysi mamlakatlar bu marraga yaqin qolmoqda?
Koronavirus oqibatida vafot etgan tibbiyot xodimlari soni hisoblab chiqildi
Pandemiya boshidan buyon dunyoda kamida 115 ming tibbiyot xodimi koronavirus oqibatida hayotdan ko‘z yumdi. Bu haqda Jahon sog‘liqni saqlash tashkiloti bosh direktori Tedros Adanom Gebreyesus ma’lum qildi.“Qariyb 18 oy mobaynida butun dunyodagi tibbiyot xodimlari hayot va o‘lim chegarasida turdi. Ular son-sanoqsiz hayotlarni qutqarib, barcha harakatlarga qaramay, hayotni tark etganlar uchun kurashdi. Ularning aksariyati o‘zlari ham kasallandi, hisobot to‘liq bo‘lmasa-da, bizning hisob-kitoblarimizga ko‘ra, sog‘liqni saqlash sohasining kamida 115 ming xodimi boshqalarni qutqarish uchun eng katta badalni to‘ladi”, — dedi Gebreyesus.
Shu bilan birga, pandemiya boshidan buyon ko‘plab tibbiyot xodimlari “individual himoya vositalari va vaksinalardan foydalanish imkoniyatining yo‘qligi sababli o‘zlarini hafsalasi pir bo‘lgan, chorasiz va himoyasiz” his qilmoqda, deya qo‘shimcha qildi JSST rahbari.
Xususan, barcha COVID-vaksinalarning 75 foizdan ortig‘i bor-yo‘g‘i o‘nta mamlakatga borib yetgan.
“Agar teng taqsimlanganida edi, butun dunyoda kiritilayotgan dozalar miqdori bugungi kunda barcha tibbiyot xodimlari va keksa kishilarni qamrab olish uchun yetarli bo‘lgan bo‘lardi”, — deya qo‘shib qo‘ydi Gebreyesus.
JSST rahbari qayd etishicha, pandemiya tugagani yo‘q va agar koronavirusning tarqalishi barcha mamlakatlarda nazorat ostiga olinmasa, u davom etadi. Gebreyesus, shuningdek, milliy hukumatlarni sentabrga qadar aholining kamida 10 foizini, 2021-yil oxirigacha esa 30 foizini emlashga chaqirdi.
Britaniyada itlar koronavirusni bir necha soniyada aniqlashga o‘rgatildi
London gigiyena va tropik tibbiyot maktabi mutaxassislari maxsus tayyorlangan itlar odam organizmidagi koronavirusni bir necha soniya ichida 94 foiz aniqlik bilan topadi, degan xulosaga keldi.Medical Detection Dogs xayriya tashkilotiga tegishli oltita it ishtirokida tadqiqot o‘tkazilgan, ularda 3500 dan ortiq hid namunalaridan foydalanildi. Tadqiqotchilar koronavirus simptomlari bo‘lgan odamlarning kiyimlari va niqoblarini to‘pladi.
Chunonchi, 200 ta paypoqdan namunalar olinib, laboratoriya sinovlari uchun oltita itga taqdim etildi. Itlar namunada koronavirusning kimyoviy birikmasi bor-yo‘qligini aniqlashga o‘rgatildi. Umuman olganda, itlar koronavirus namunalarining 82-94 foizini muvaffaqiyatli aniqlay oldi.
Itlar bir necha soniya ichida tashxis qo‘yib, tezlik bo‘yicha PZR-testni ortda qoldirdi. Bitta guruhda ikkita bo‘lib ishlash orqali itlar yarim soatda 300 kishini tekshirishi mumkin — o‘rtacha olganda bu bitta aviareys sig‘imiga teng, shu sababli hayvonlardan aeroportlarda foydalanish rejalashtirilmoqda.
Izoh (0)