Tojikiston Qishloq xo‘jaligi vazirligi 83 944 gektar maydonga chigirtkalar tarqalganini ma’lum qildi. Hozirda 67 ming gektar yer maydoniga kimyoviy ishlov berildi. Chigirtkalarga qarshi kurash uchun o‘nlab texnikalar, aerozol qurilmalar va boshqa manbalar jalb etildi, deb yozmoqda Asia-Plus.
Chigirtkalar asosan Xatlon viloyatidagi ekin maydonlariga (55,1 ming gektar) xavf solmoqda.
Qishloq xo‘jaligi vazirligi qoshida bugungi kunda dalalarni chigirtka bosqinidan saqlab qolish uchun barcha choralarni ko‘rayotgan “Chigirtkaga qarshi kurash ekspeditsiyasi” faoliyat olib bormoqda.
Bir oy avval qishloq xo‘jaligi vaziri Sulaymon Ziyozoda xo‘jaliklarni ehtimoliy chigirtka bosqinidan ogohlantirib, mahalliy hukumatni hasharotlarga qarshi kurashishga chaqirgan edi.
Lekin ushbu hasharotlarning mintaqadagi barcha mamlakatlarda keng tarqalgani vaziyatni murakkablashtirib, qo‘shni davlatlar va xalqaro tashkilotlar bilan birgalikda harakat qilishni talab qilmoqda.
2020-yilning oxirida BMTning Oziq-ovqat va qishloq xo‘jaligi tashkiloti (FAO —Food and Agriculture Organization) bilan chigirtkalarga qarshi kurashish loyihasini amalga oshirish to‘g‘risida shartnoma imzolangan edi. Loyiha Yaponiya hukumati tomonidan moliyalashtirilmoqda. Shuningdek, chora-tadbirlar ko‘lami Afg‘oniston va Qirg‘izistonni ham qamrab oladi.
Loyihaning ikkinchi bosqichi 2020—2025-yillarga mo‘ljallangan bo‘lib, unga O‘zbekiston, Turkmaniston va Qirg‘iziston davlatlari ham jalb qilinadi.
Loyihaning birinchi bosqichini amalga oshirish uchun Yaponiya hukumati Tojikistonga 7,4 million dollar ajratdi.
FAO’ning ma’lum qilishicha, hatto o‘rtacha kattalikdagi chigirtka to‘dasi bir yarim yil davomida ikki yarim ming kishini boqish uchun yetarli bo‘lgan ekinlarni yo‘q qilishi mumkin.
Avvalroq Yaponiya hukumati va Birlashgan Millatlar Tashkilotining Oziq-ovqat va qishloq xo‘jaligi tashkiloti Markaziy Osiyoda chigirtkaga qarshi kurashni kuchaytirish bo‘yicha loyihaga 7,25 million dollar ajratishi haqida xabar berilgan.
Izoh (0)