Belarus hukumati Ryanair samolyotiga bomba o‘rnatilgani haqidagi xatni o‘qib eshittirdi. Uni portlatish bilan go‘yoki HAMAS harakati tahdid qilgan

23-may kuni Afinadan Vilnyusga uchayotib, Minskka shoshilinch qo‘ngan Ryanair reysi bortida bomba borligi haqidagi xabar HAMAS harakati tomonidan yuborilgan. Bu haqda Belarus Transport va kommunikatsiyalar vazirligining aviatsiya departamenti direktori Artyom Sikorskiy ma’lum qildi, deb yozadi Meduza.

Sikorskiyning so‘zlariga ko‘ra, Minsk milliy aeroporti elektron pochtasiga quyidagi xat ingliz tilida kelib tushgan:

“Biz, HAMAS askarlari Isroil G‘azo sektorida o‘t ochishni to‘xtatishini talab qilamiz. Yevropa Ittifoqi bu urushda Isroilni qo‘llab-quvvatlashdan voz kechishini talab qilamiz. Delfi Economic Forum ishtirokchilari 4978 reysi bilan uyga qaytayotgani ma’lum. Bu samolyotga bomba qo‘yilgan. Agar siz bizning talablarimizni bajarmasangiz, bomba 23-may kuni Vilnyus osmonida portlaydi”.

Sikorskiyning aytishicha, Belarus dispetcherlari Ryanair samolyoti ekipajiga ushbu xavf haqida xabar bergan, shundan keyin ekipaj Minsk xalqaro aeroportiga qo‘nish haqida qaror qabul qilgan. Mansabdor qayd etishicha, “havo kemasini qo‘ndirishga qaratilgan hech qanday bosim yoki majburlash bo‘lmagan”.

O‘z navbatida, Belarus Qurolli Kuchlari havo hujumiga qarshi mudofaa qo‘shinlari va harbiy-havo kuchlari qo‘mondoni Igor Golub MiG-29 qiruvchi samolyoti Ryanair ekipaji samolyotni Minsk aeroporti tomonga burganidan keyingina havoga ko‘tarilganini aytdi.

“Navbatchi ekipaj Ryanair borti parvozini to‘xtatdi deyish qonunga to‘g‘ri kelmaydi”, — dedi Golub.

23-may kuni Afinadan Vilnyusga yo‘l olgan Ryanair aviakompaniyasi samolyoti Minsk aeroportiga shoshilinch qo‘ndi. Bu bortga bomba o‘rnatilgani haqidagi xabardan keyin yuz berdi. Oxir-oqibat u yolg‘on bo‘lib chiqdi. Belarus osmonida bortga MiG-29 harbiy qiruvchi samolyoti hamrohlik qildi.

Ryanair samolyoti yo‘lovchilari orasida Nexta muxolifatchi Telegram kanali sobiq bosh muharriri Roman Protasevich bor edi, Belarusda unga qarshi bir qator jinoyat ishlari qo‘zg‘atilgan. Protasevich va uning sevgilisi, Rossiya fuqarosi Sofya Sapega aeroportda qo‘lga olindi.

20-may kuni HAMAS va Isroil hukumati ikki hafta davom etgan nizolardan keyin o‘t ochishni to‘xtatish haqida kelishuvga erishgan edi.

Delfi Economic Forum — Gretsiyaning notijorat tashkiloti bo‘lib, Yevropa va Sharqiy O‘rta Yer dengizi mamlakatlarining barqaror va raqobatbardosh bo‘lib o‘sishi” uchun g‘oyalar qidirishni o‘z maqsadi sifatida ilgari suradi.