Litva Belarus havo hududidan o‘tadigan reyslarni qabul qilmaydi va jo‘natmaydi. Mamlakat o‘z fuqarolaridan Belarusni tark etishni so‘radi

Litva hukumati mamlakat hududida joylashgan aeroportlarga yo‘nalishi Belarus havo hududidan o‘tuvchi reyslarni qabul qilishni va yuborishni taqiqladi. Bu haqda hukumat majlisi yakunlari bo‘yicha kommunikatsiya va transport vaziri Maryus Skuodis ma’lum qildi, deb yozadi Meduza. Taqiq 25-may kuni kuchga kiradi.

Litva hukumati aniqlik kiritishicha, bunday qaror 23-may kuni bortda portlovchi qurilma borligi haqidagi xabarlar tufayli Minsk aeroportiga majburan qo‘ngan Ryanair samolyoti bilan bog‘liq hodisadan keyin xavfsizlik nuqtayi nazaridan qabul qilingan. Afinadan Vilnyusga uchayotgan ushbu samolyotda muxolifatchi Nexta Telegram kanali sobiq bosh muharriri Roman Protasevich bo‘lgan va yo‘lovchilar Vilnyusga parvoz davom ettirilguniga qadar Minsk aeroportida qariyb yetti soat vaqt o‘tkazgan.

Shuningdek, Litva fuqarolariga Belarusga uyushtiriladigan har qanday safarlardan voz kechish, hozir o‘sha yerda bo‘lganlarga esa mamlakatni tark etish qat’iy tavsiya etiladi. Bu haqda mamlakat Tashqi ishlar vazirligi ma’lum qildi. Vazirlikning tavsiyalari ham Ryanair samolyoti bilan yuz bergan hodisaga borib taqaladi. Litvalik diplomatlar fikricha, bu vaziyat “fuqarolar xavfsizligi va hayoti uchun tahdid yaratgan”.

Ryanair reysining qo‘ndirilishi holati bo‘yicha Litva hukumati jinoyat kodeksining samolyotning qo‘lga olinishi va odamlarni noqonuniy ushlab turish moddalari bo‘yicha rasmiy surishtiruv boshladi.

Avvalroq Latviyaning airBaltic va Vengriyaning Wizz Air aviakompaniyalari o‘z samolyotlari Belarus havo hududini aylanib o‘tayotganini ma’lum qilgandi. Ba’zi boshqa aviakompaniyalar, masalan, KLM ham shunday yo‘l tutdi. Rossiya aviatashuvchilari esa hamon Belarus havo hududi orqali uchmoqda.

Latviya tashqi ishlar vaziri Edgar Rinkevich Yevroittifoq Ryanair samolyoti bilan bog‘liq voqeaga javoban qabul qilishi mumkin bo‘lgan choralardan biri — Belarus aviakompaniyalari, birinchi navbatda, Belavia’ning Yevropaga parvozlarini taqiqlash bo‘lishi mumkinligini aytdi. Financial Times ma’lumotlariga ko‘ra, bu taqiq Yevroittifoqning 24-maydagi sammitida ko‘rib chiqilishi mumkin.