Malayziya poytaxti Kuala-Lumpurda ikki metro poyezdi to‘qnashib, 200 dan ortiq kishi jarohat oldi. Bu haqda Alghadeer TV xabar berdi.
Mamlakat transport vazirining so‘zlariga ko‘ra, 47 kishi jiddiy jarohat olgan. Barcha yaradorlar voqea joyidan evakuatsiya qilinib, ahvoli og‘ir kishilar kasalxonaga yotqizilgan.
Ma’lum bo‘lishicha, hodisa vaqtida poyezdlardan biri 232 nafar yo‘lovchini olib ketayotgan, ikkinchisi esa bo‘sh bo‘lgan. Bo‘sh poyezd ishga tushirilishidan avval sinov rejimida harakatlangan.
Politsiya aniqlik kiritishicha, bo‘sh poyezd boshqa yo‘ldan yurishi kerak bo‘lgan. Uning so‘zlariga ko‘ra, sinov poyezdini haydovchi boshqargan, ikkinchisi navigatsiya tizimi tomonidan avtonom boshqarilgan.
Hodisa 24-may kuni mahalliy vaqt bilan soat 20:45 (Toshkent vaqti bilan 17:45) da sodir bo‘lgan. Petronas egizak minoralari yaqinidagi yer osti tunnelida ikki metro poyezdi to‘qnashgan. Poyezdlardan biri 20 km/soat, ikkinchisi taxminan 40 km/soat tezlikda harakatlangan.
Transport vaziri ta’kidlashicha, bu voqea mamlakatda yengil relsli transport yo‘lga qo‘yilgandan beri birinchi metro avariyasi.
“Hodisa yuzasidan tergov hali davom etmoqda... Ammo taxminimizcha, poyezdlarning boshqaruv markazida tushunmovchilik bo‘lgan”, — degan politsiya boshlig‘i.
Eslatib o‘tamiz, 3-may kuni Mexikoda metro ko‘prigi poyezd bilan birga qulab tushib, 27 kishi halok bo‘lgan edi. Shundan so‘ng Meksikada metro halokati qurbonlari xotirasiga uch kunlik motam e’lon qilindi.
Izoh (0)